संजय माने | पोईप : गावात केवळ रस्ते, इमारती व मूलभूत भौतिक सुविधा निर्माण केल्याने गावचा विकास होत नाही. यां सुविधा शेती मालाच्या उत्पादनास पूरक आहेत. गावातील शेतकऱ्यांच्या शेतमाल उत्पादनात वाढ झाल्यावरच खऱ्या अर्थाने गावचा विकास होईल, शेती उत्पादन वाढविण्यासाठी ग्रामपंचायत, कृषी विभाग व गावाने एकत्र येऊन प्रयत्न केले, पाहिजेत असे प्रतिपादन मालवण तालुका कृषी अधिकारी श्री. ई. ल. गुरव यांनी गोळवण सावरवाडी येथे बोलताना केले.
मालवण तालुक्यातील गोळवण - सावरवाडी येथे श्री. सत्यविजय साबाजी पालव यांच्या काजू फळबागेमध्ये HORTSAP अंतर्गत काजू शेतीशाळेचे आयोजन करण्यात आले होते. या कार्यक्रमाची सुरुवात तालुका कृषी अधिकारी श्री. ई. ल. गुरव यांच्या हस्ते काजू रोपाचे पूजन करून तसेच त्याची लागवड करून करण्यात आले.
यावेळी तालुका कृषी अधिकारी श्री. गुरव यांनी काजू मोहर संरक्षणा बद्दल शेतकऱ्यांना प्रत्यक्ष काजू फळबागे मध्ये विस्तृतरित्या मार्गदर्शन केले. तसेच कृषी मंडळ अधिकारी श्री. आर. एस. चव्हाण व कृषि पर्यवेक्षक श्री. डी. के. सावंत यांनीही शेती विषयावर मार्गदर्शन केले. तसेच गोळवण- डिकवल- कुमामे ग्रामपंचायतीचे सरपंच श्री. सुभाष लाड यांनीही विचार मांडले.
या कार्यक्रमास उपसरपंच शरद मांजरेकर, ग्रामपंचायत सदस्य प्राजक्ता चिरमुले, साबाजी गावडे , ग्रामसेविका शेलटकर तसेच भाई चिरमुले, संतोष चव्हाण, अमित घाडी, नामदेव चव्हाण, नामदेव परब, सुंदर लाड, गजानन गावडे मनोहर परब, गणेश तावडे, रामकृष्ण नाईक आदी व इतर उपस्थित होते. कार्यक्रमाचे सूत्रसंचालन निलेश पाताडे यांनी केले.
