अदित्य बटावले | सावंतवाडी : सावंतवाडी पंचायत समितीच्या तालुका आरोग्य विभागासाठी उभारण्यात येणाऱ्या इमारतीसाठी ९० लाख रुपये मंजूर झाले आहेत. सावंतवाडीच्या सालईवाड्यातील जुन्या पंचायत समितीजवळ ही इमारत उभारण्यात येणार असून ही इमारत दुमजली असणार आहे. सावंतवाडी तालुका आरोग्य विभागासाठी स्वतंत्र इमारत असणार आहे. सावंतवाडी पंचायत समितीची शिरोडा नाका येथे जिल्हा परिषद बांधकाम कार्यालय येथे नवीन इमारत उभारण्यात येणार आहे.
शासनाकडून त्यासाठी १६ कोटी रुपये मंजूर झाले आहेत. या इमारतीचे भूमिपूजन झालेले आहे.तसेच निविदाही निघाल्या आहेत. मध्यंतरी निविदा उघडण्याच्या वेळी बाउंसर्स ठेकेदारांने आणल्यामुळे तो चर्चेचा विषय ठरला होता. त्यामुळे पंचायत समितीच्या इमारतीच्या बांधकामाबाबत सध्या संभ्रमावस्था असली तरी तालुका आरोग्य विभाग इमारत जुन्या पंचायत समिती कार्यालयाजवळ होणार आहे. त्यासाठी सुमारे ९० लाख रुपये मंजूर आहेत. येत्या दोन महिन्यात या कामाला सुरुवात होईल. या ठिकाणी पूर्वी पंचायत समितीची कार्यालये होती. परंतु जीर्ण इमारत झाल्याने ती जिल्हा परिषद बांधकाम कार्यालय येथे पंचायत समितीचे कार्यालय हलविण्यात आली. आता केवळ येथे गटाशिक्षणाधिकारी व अन्य काही कार्यालये आहेत.
