आमदार निलेश राणे यांचे कुडाळ पोलीस निरीक्षकांना पत्र
मिली मिश्रा | कुडाळ : कुडाळ-मालवणचे आमदार निलेश राणे यांनी कुडाळ येथील पोलीस निरीक्षक यांना लेखी पत्र देत कुडाळ तालुक्यातील धार्मिक स्थळांवर कायमस्वरूपी लावलेल्या अनधिकृत भोंग्यांवर कारवाई करण्यात यावी असे म्हटले आहे.
कुडाळ तालुक्यातील धार्मिक स्थळांवर लावलेले अनधिकृत भोंगे व आणि त्यावरून होणारे ध्वनी प्रदूषण हा कळीचा मुद्दा बनला आहे. न्यायालयाच्या निर्देशानुसार महाराष्ट्र सरकारने ध्वनिप्रदूषणाविषयी नियमावली निश्चित केली आहे. त्यामध्ये शांतता क्षेत्रात रात्री ४० तर दिवसा आवाजाची मर्यादा ५० डेसिबल इतकी असावी. निवासी क्षेत्रात आवाजाची मर्यादा रात्री ४५ तर दिवसा ५५ डेसिबलपर्यंत असावी. वाणिज्य क्षेत्रात हीच मर्यादा रात्री ५५ तर दिवसा ६५ डेसिबलपर्यंत आहे तर औद्योगिक क्षेत्रात आवाजाची मर्यादा रात्री ७० तर दिवसा ७५ डेसिबल इतकी आहे.
असे असले तरी धार्मिक स्थळांवर कायमस्वरूपी लावलेले भोंगे प्रत्यक्षात लावलेल्या ठिकाणी ही मर्यादा पाळत नाहीत. त्यामुळे असे भोंगे लावल्याने कायद्याचे उल्लंघन होत नाही मात्र त्यासाठी स्थानिक पोलीस ठाण्याची अनुमती घेवून आणि वरील आवाजाच्या मर्यादेत ते लावणे बंधनकारक आहे.
मात्र अजान देताना त्याचे पालन होत नाही. तरी अनिधिकृत भोंगे व त्यामुळे होणारे ध्वनी प्रदुषण यासंदर्भात कुडाळ तालुक्यातील धार्मिक स्थळांवर कायमस्वरूपी लावल्या भोंग्यांवर धडक कारवाई करावी असे निलेश राणे यांनी पत्रात म्हटले आहे.
