नवदुर्गा : सौ. अनिता आप्पा आळवे

• कष्टकरी कर्तृत्वाचा आदर्शवत जीवनप्रवास

💐 नवदुर्गा : पुष्प पाचवे 💐

नवदुर्गा : सौ. अनिता आप्पा आळवे

प्रत्येक महिला ही देवीचेच रूप असते. हीच महिला रुपी देवी नानाविध रूपांनी समाजात वावरत असते. संघर्ष व कष्टमय जीवन प्रवासातून समाजात आदर्श निर्माण करत असते. यापैकीच एक नारीशक्ती मालवणच्या सौ. अनिता आप्पा आळवे या होय.

मूळ मालवण देवली गावातील अनिता आळवे या मालवण शहरात वास्तव्यास आहेत. त्यांचे पती नोकरीनिमित्त गुजरातला असून अनिता या आपल्या मुलगी व मुलगा यांच्यासमवेत मालवणात राहतात. दोन दशकांपूर्वी त्यांनी बहिणीच्या सल्ल्यानुसार चहा-नाष्टाचा व्यवसाय सुरू केला. मालवण शहरात सायकल वरून फिरून त्या चहा विक्री करतात. चहा व्यवसायाच्या निमित्ताने शहरात दिवसभर फिरणाऱ्या ह्या स्त्री शक्तीचे प्रचंड श्रम आहेत. मात्र नेहमी हसतमुख चेहरा असणारी ही माऊली खऱ्या अर्थाने मालवणच्या कष्टकरी कर्तृत्वाचा अभिमान आहे.

त्यांचा अनिता आळवे यांनी नव्वदच्या दशकात होमगार्डमधून 12 वर्षे सेवा बजावली. त्यांनतर पोस्टात एजंट म्हणून काही वर्षे काम केले. एक उत्तम गृहिणी असणाऱ्या अनिता यांच्या हातालाही ‘चव’ आहे. तिच्या बहिणीने तिला चहा नाश्ता विक्रीचा व्यवसाय सुरू करण्यासाठी प्रोत्साहन दिले. अन सुरू झाला सायकलवरून चहा विक्रीचा व्यवसाय. अनिता आळवे यांचा दिवस पहाटे पाच वाजता सुरू होतो. चहा-नाष्टाची तयारी झाल्यावर सकाळी ९ ते १० वाजल्यापासून दुपारी एक वाजेपर्यंत त्या सायकल चालवत चहा-कॉफीची विक्री करतात. त्यानंतर दुपार ते सायंकाळ पर्यंत असा नित्यनियमाने व्यवसाय करतात. रात्रीच्या वेळी खानावळी साठी रुचकर डबे विक्री ही त्यांनी केली. दिवसभर १५ ते १८ तास या माऊलीचे कष्ट व मेहनत सुरू असते. चहा व्यवसायातून दोन मुलांचे शिक्षण व संसाराचा गाढा यशस्वीपणे सांभाळला. अनिता आळवे यांची मुलगी निकीता व मुलगा अजय यांचे पदवीपर्यत शिक्षण झाले. मूले जमेल त्या प्रमाणे आईला मदत करतात.

एकूणच या माऊलीचा जिवन प्रवास पुढील काळात सुखद व आनंददायी होवो. त्यांना निरोगी दीर्घायुष्य लाभो. हीच प्रार्थना. स्काय न्यूज टुडे परिवाराच्या वतीने अनिता आळवे आपणास लक्ष लक्ष शुभेच्छा.