मालवण | प्रतिनिधी : किल्ले सिंधुदुर्ग नजीकच्या खडकाळ भागात गुरुवारी सकाळी भलामोठा शार्क माशाचा कुजलेल्या अवस्थेतील सांगाडा दिसून आला आहे. समुद्र खवळलेला असल्याने संबंधित प्रशासकीय यंत्रणेला तेथपर्यंत पोचणे कठीण बनले आहे.
समुद्रातील वादळ सदृश परिस्थितीमुळे गेले काही दिवस किनारपट्टी भागात मुसळधार पाऊस कोसळत आहे. बुधवारी रात्री मुसळधार पाऊस कोसळला. समुद्राला आलेल्या उधाणात मध्यरात्री किल्ले सिंधुदुर्ग लगतच्या खडकाळ भागात एक भलामोठा कुजलेल्या अवस्थेतील शार्क माशाचा सांगाडा अडकला. सकाळी किल्ल्यातील स्थानिक रहिवासी यांना हा माशाचा सांगाडा दिसून आला. सुमारे १५ फूट पेक्षा जास्त लांबीचा हा सांगाडा असून तो पूर्णतः कुजला आहे. माशाचा तोंडाचा भाग अस्तित्वात नाही तर अन्य भागाचा सांगाडा व मांस असल्याचे दिसून येत आहे. समुद्र खवळलेला आहे. त्यामुळे या माशाची विल्हेवाट लावण्यास संबंधित यंत्रणा तेथपर्यंत पोचणे कठीण आहे. तसेच समुद्राला उधाण स्थिती निर्माण झाल्यास सांगाडा पुन्हा समुद्रात वाहून जाण्याची शक्यताही वर्तविली आहे.
अमित खोत, मालवण
