शेतकऱ्यांच्या हिताच्या दृष्टीने आचरा, कोळंब, मालवण येथील स्वयंचलित हवामान केंद्र बदलून देण्याची केली मागणी
मालवण : मालवण तालुक्यातील स्वयंचलित हवामान केंद्र समुद्रापासून जवळ असल्यामुळे आचरा, कोळंब व मालवण या ग्रामीण मंडळातील हवामान बदल या केंद्रात नोंदले जात नसल्यामुळे सबंधित मंडळातील शेतकरी पिक विम्यापासून गेली दोन वर्षे वंचित राहत आहेत. तरी सदरील स्वयंचलित हवामान केंद्र बदलून ग्रामीण स्तरावर नेण्यात यावे. अशी मागणी भाजपा मालवण तालुकाध्यक्ष धोंडी चिंदरकर यांनी पालकमंत्री नितेश राणे यांच्याकडे केली आहे.
दिलेल्या निवेदनात म्हटले आहे, सन २०२२/२३ मध्ये महावेद प्रकल्प अंतर्गत वेगुर्ला तहसील कार्यालयासमोर असलेले स्वयंचलित हवामान केंद्र बदलून कुशेवाडा येथे नेण्यात आले होते.
तरी याच धर्तीवर मालवण तालुक्यातील स्वयंचलित हवामान केंद्र बदलून ग्रामीण स्तरावर नेण्यात यावे जेणेकरून ग्रामीण स्तरावरील सर्व शेतकऱ्यांना पिक विम्याचा लाभ मिळू शकेल. ही नम्र विनंती.
यावेळी जिल्हा चिटणीस महेंद्र चव्हाण, जिल्हा कार्यकारणी सदस्य राजू परुळेकर, तालुका सरचिटणीस विजय निकम, महेश मांजरेकर आदी पदाधिकारी यावेळी उपस्थित होते.
