मालवण भंडारी ए. सो. प्राथमिक शाळा व बालवाडीच्या विद्यार्थ्यांनी साकारला 'वारी' सोहळा
जुबेर खान | मालवण : आषाढी एकादशीच्या निमित्ताने अवघा महाराष्ट्र विठ्ठलमय होऊन गेला असताना मालवण तालुक्यात अनेक शाळांमध्यें आषाढी एकादशीच्या पुर्वसंध्येला वारकरी दिंडीचे आयोजन करण्यात आले होते. आज मालवणमधील भंडारी ए. सो. प्राथमिक शाळा व बालवाडीच्या विद्यार्थ्यांनी आषाढी एकादशीच्या पार्श्वभूमीवर वारकरी दिंडी काढली. जय जय विठ्ठल… जय हरी विठ्ठल असा विठुरायाचा जयघोष करत आणि विठ्ठल रुक्मिणी व वारकऱ्यांच्या पारंपारिक वेशभूषा करीत ही दिंडी काढण्यात आली.
भंडारी प्राथमिक शाळेसह मालवण तालुक्यातील इतर शाळांमध्येही आषाढी एकादशीच्या पूर्वसंध्येला मुलांनी वारकरी दिंडी काढली. भंडारी प्राथमिक शाळेत काढलेल्या वारकरी दिंडी मध्ये विठ्ठल, रुक्मिणी आणि वारकऱ्यांची आकर्षक वेशभूषा करत, कपाळावर टिळा लावत, डोईवर तुलसी वृंदावन घेऊन, भगव्या पताका फडकवत आणि टाळ चिपळीच्या ससंगे विठू नामाचा गजर करत लहान मुले सहभागी झाली होती. मुलांनी साकारलेल्या या वेशभूषा सर्वांचेच आकर्षण ठरल्या. शिक्षकांच्या मार्गदर्शनाखाली मुलांनी ही वारकरी दिंडी काढली.
यावेळी भंडारी ए सो प्राथमिक शाळेचे मुख्याध्यापक भूपेश गोसावी, शिक्षिका सौ. राधा दिघे, श्रीमती स्वाती दळवी, सौ. पूर्वी गोवेकर, श्रीमती मानसी परुळेकर, सौ. तृप्ती वालावलकर, सौ. योगिता तारी आदी उपस्थित होते.
