मानसिक आरोग्याच्या समस्या व जनजागृतीबाबत लायन्स क्लब मालवणचा पुढाकार!

मानसिक आरोग्य समुपदेशक प्रा. सौ. मेघना जोशी यांची भेट घेऊन चर्चा

मालवण | प्रतिनिधी : समाजातील मानसिक आरोग्याच्या वाढत्या समस्या, त्यावरील उपचारपद्धती आणि जनजागृतीची आवश्यकता लक्षात घेऊन लायन्स क्लब मालवणच्या पदाधिकाऱ्यांनी स्थानिक मानसिक आरोग्य समुपदेशक प्रा. सौ. मेघना जोशी यांची भेट घेतली. यावेळी मालवण व परिसरातील नागरिकांना भेडसावणाऱ्या मानसिक आरोग्यविषयक समस्या, त्यामागील कारणे, समुपदेशनाचे महत्त्व तसेच उपलब्ध उपचारपद्धती याबाबत माहिती जाणून घेण्यात आली.
या भेटीप्रसंगी लायन्स क्लब मालवणचे अध्यक्ष सहदेव बापार्डेकर व खजिनदार राधिका मोंडकर उपस्थित होते.मानसिक आरोग्याबाबत समाजात सकारात्मक दृष्टिकोन निर्माण करणे, मानसिक तणाव व अन्य समस्यांबाबत नागरिकांमध्ये जागरूकता वाढविणे आणि गरजू व्यक्तींना योग्य वेळी समुपदेशन व उपचार मिळण्याच्या दृष्टीने जनजागृती करणे या विषयांवर चर्चा करण्यात आली. मानसिक आरोग्याविषयी असलेले गैरसमज दूर करून नागरिकांना योग्य मार्गदर्शन मिळणे आवश्यक असल्याचे यावेळी अधोरेखित करण्यात आले.