सासरच्या छळाला कंटाळून नवविवाहितेने पेट्रोल ओतून घेतले जाळून

मुलीच्या वडिलांची कुडाळ पोलिसात तक्रार

मुलीची प्रकृती चिंताजनक

निलेश जोशी | कुडाळ : कणकवली तालुक्यातील नाटळ खांदरवाडी येथील नवविवाहिता अंकिता रणबीर कदम (वय  30)  हिने आपले आई-वडील राहत असलेल्या कुडाळ  तालुक्यातील नेरुर-रावलेवाडी येथील घरी २ जुलै रोजी रात्री बारा वाजण्याच्या सुमारास ग्रासकटरसाठी आणलेले पेट्रोल अंगावर ओतून घेऊन आग लावून आत्महत्या करण्याचा प्रयत्न केला.  त्यात ती गंभीररीत्या भाजली असून तिला अधिक उपचारासाठी जिल्हा रुग्णालय ओरस येथे दाखल करण्यात आले आहे. 
    जखमी अंकिताचे वडील सुभाष झिलू नेमण (मूळ रा मातोंड-गोवळवाडी सध्या रा नेरुर रावलेवाडी) यांनी कुडाळ पोलिसात दिलेल्या तक्रारीवरून अंकिताचा पती रणबीर प्रकाश कदम (वय 35, रा खांदरवाडी नाटळ) सासरे प्रकाश गणपत कदम (वय 70)  व सासू (नाव माहित नाही) या तिघांविरोधात कुडाळ पोलीस ठाण्यात बीएनएस 85/108/62 अन्वये गुन्हा दाखल करण्यात आला आहे.  काल बुधवारीच अंकिताचे सासरे प्रकाश कदम यांनी अंकिताला रिक्षाने आणून माहेरी सोडले.  ही काही काम करत नाही, हिला माहेरीच ठेवून घ्या, असे सांगून ते निघून गेले आणि रात्री अंकिताने आत्महत्येचा प्रयत्न केला.  सासरी अंकिताचा छळ होत होता.  त्यामुळे त्यांनी तिला आत्महत्येस प्रवृत्त केल्याचे, वडिलांनी तक्रारीत म्हटले आहे.  अधिक तपास एपीआय वैशाली आडकुर करीत आहेत.