मसूरेत अमली पदार्थ विरोधी जनजागृती फेरी
मसूरे | प्रतिनिध : जागतिक अमली पदार्थ विरोधी दिनानिमित्त मसूरे पोलीस आउट पोस्टच्या वतीने पोलीस आऊट पोस्ट मर्डे ते ग्रामपंचायत दरम्यान अंमली पदार्थ विरोधी जनजागृती फेरीचे आयोजन करण्यात आले होते. यावेळी मसुरे पोलीस स्टेशनचे अंमलदार संजय हुंबे यांनी उपस्थितांना अमली पदार्थ सेवनाने होणा-या दुष्परिणामाबाबत माहिती दिली. आजची तरुण पिढी अमली पदार्थांच्या विळख्यात सापडत आहे. समाजात गुन्हेगारी सुद्धा अमली पदार्थांमुळे वाढत आहे. त्यामुळे या विरोधात व्यापक प्रमाणात जनजागृती होणे आवश्यक आहे. निर्व्यसनी सक्षम पिढी निर्माण होण्यासाठी व्यसनधिनतेशी संबंधित प्रतिबंधात्मक उपाय योजना याबाबत जागृती होणे आवश्यक असल्याने सदर जनजागृती फेरीचे आयोजन करण्यात आल्याचे पोलीस अंमलदार संजय हुंबे म्हणाले.
यावेळी आर. पी. बागवे हायस्कुल मसूरे आणि भरतगड इंग्लिश मिडीयम स्कुलचे विध्यार्थी सहभागी झाले होते. 'नशामुक्त भारत सशक्त भारत', 'नशा सोडा प्रगती करा ' अशा घोषणांनी मसूरे मर्डे मुख्यरस्ता परीसर निनादून गेला होता. यावेळी कॉन्स्टेबल तुषार वाघाटे, पोलीस पाटील सौ प्राजक्ता पेडणेकर, मुख्याध्यापिका संतोषी मांजरेकर, सायली म्हाडगूत, श्रुतिका लाड, श्री गोसावी, सुनिल बांदेकर, समीर नाईक, एन. एस. जाधव, विवा तळाशिलकर, आर्या भोगले, शैलेश मसुरकर तसेच विध्यार्थी, ग्रामस्थ उपस्थित होते.
