दांडी झालझुलवाडी येथे मिळाले आययूसीएन रेड लिस्ट ऑफ एन्डेंजर्ड स्पेशिज मधील लॉगरहेड समुद्री कासव
मालवण : दांडी झालझुल वाडी येथील समुद्र किनाऱ्यावर २० जून रोजी संध्याकाळी समुद्राच्या लाटांमध्ये किनाऱ्यालगत घोस्ट नेटमध्ये कासव अडकलेल्या स्थितीत असल्याचे संतोष खवणेकर, प्रविण (बाळा) पराडकर, महेंद्र कुबल, नारायण (दादू) लोणे या पारंपरिक मच्छिमारांच्या निदर्शनास आले. मग लगेच प्रविण (बाळा) पराडकर, महेंद्र कुबल यांनी पाण्यात जाऊन ते कासव घोस्ट नेटसह उचलून किनाऱ्यावर आणले. त्यानंतर संतोष खवणेकर यांनी चाकूच्या साहाय्याने दोरखंड कापून ते कासव घोस्ट नेट मधून सोडविले व नारायण (दादू) लोणे यांनी त्या कासवास सुखरूप समुद्रात सोडून जीवदान दिले.
त्या कासवाची फोटो व्हिडीओ संतोष खवणेकर व रोहन चिंदरकर याने युथ बिट्स फॉर क्लायमेट या संस्थेचा सदस्य अक्षय रेवंडकर यास दर्शविले असता त्याने ते समुद्री कासव दुर्मिळ लॉगरहेड असल्याचे सांगितले. हे कासव IUCN च्या यादीमध्ये असुरक्षित म्हणून सूचीबद्ध आहे. तसेच लॉगरहेड समुद्री कासव हे एक मोठे सागरी कासव आहे, ज्याला त्याच्या मोठ्या डोक्यामुळे हे नाव मिळाले आहे. ते जगातील सर्वात मोठे कठीण कवच असलेले कासव आहे. याचे डोके मोठे आणि मजबूत असते, ज्यामुळे ते शंख आणि कठीण कवच असलेल्या प्राण्यांना सहजपणे खाऊ शकते अशी माहिती अक्षय ने दिली.
विडियो पहा..
