नक्षत्र टाॅवर आणि पोस्ट ऑफीस समोर घंटागाड्या आठवडा बाजारादिवशी उपलब्ध करून देण्यात येणार
निलेश जोशी | कुडाळ : नगरपंचायत प्रशासनाकडून आठवडा बाजारादिवशी बुधवारी शहरात फिरते भाजी, फळ विक्रेत्यांमध्ये प्लास्टिक बंदी आणि स्वच्छतेबाबत जनजागृतीपर मोहीम राबविण्यात आली.
न.पं.कडून शहरात प्लास्टिक बंदीबाबत प्रभावीपणे अंमलबजावणी करण्यात येत आहे. या अंतर्गत व्यापारी, व्यावसायिक, फिरत्या विक्रेत्यांमध्ये जनजागृती करून, न.पं.ला सहकार्य करण्याचे आवाहन करण्यात आले आहे. प्लास्टिक पिशव्यांचा वापर करणा-यांवर दंडात्मक कारवाईही केली जात आहे. बुधवारी आठवडा बाजारादिवशी पोस्ट ऑफीस चौक ते जिजामाता चौक दरम्यान मुख्य रस्त्यालगत फिरत्या भाजी विक्रेत्यांकडून बाजार संपल्यानंतर तेथे टाकाऊ कचरा टाकला जात असल्याचा प्रकार समोर आला. याची दखल नगरपंचायत प्रशासनाने घेत, कारवाईची मोहीम हाती घेतली आहे. या अंतर्गत न.पं.च्या पथकाने आज शहरात जनजागृतीपर मोहीम राबविली. नगराध्यक्षा प्राजक्ता बांदेकर-शिरवलकर आणि मुख्याधिकारी अरविंद नातू यांच्या मार्गदर्शनाखाली न.पं.चे प्रशासकीय अधिकारी राजू पठाण, कर व मिळकत विभाग प्रमुख निलेश म्हाडेश्वर, लिपिक गजानन पेडणेकर, मुकादम दिपक कदम, रोहित परब, प्रविण कोरगावकर, केतन पवार, सतिश जाधव, साहिल कुडाळकर यांचा या पथकात समावेश आहे.
यावेळी काही फिरत्या भाजी विक्रेत्यांकडे प्लास्टिक पिशव्या आढळून आल्या. त्या जप्त करीत कारवाई करण्यात आली. तसेच प्लास्टिक पिशव्यांचा वापर बंद करावा, तसेच बाजार संपल्यानंतर टाकाऊ कचरा, तेथेच रस्त्यालगत न टाकता, त्याच दिवशी न.पं.च्या घंटागाड्यांवर द्यावा. यासाठी नक्षत्र टाॅवर आणि पोस्ट ऑफीस समोर अशा दोन ठिकाणी घंटागाड्या आठवडा बाजारादिवशी उपलब्ध करून देण्यात येणार असल्याचे सांगण्यात आले. ध्वनिक्षेपकाद्वारे प्लास्टिक बंदीबाबत नागरिकांमध्ये जनजागृती करण्यात आली. प्लास्टिकचा वापर केल्यास कारवाईचा इशारा देण्यात आला.
