लग्न जुळवून देण्याचे आमिष दाखवून सोन्याचे दागिने लुटले

मालवणातील तरुणाची फसवणूक

संशयित आरोपीला मालवण पोलिसांनी १२ तासात केली अटक 

न्यायालयाने सुनावली तीन दिवसांची पोलीस कोठडी

अमित खोत | मालवण : लग्न जुळवून देण्याचे आमिष दाखवत मालवण तालुक्यातील कांदळगांव येथील तरुणाची फसवणूक करतं सुमारे ८२ हजार किमतीचे सोन्याचे दागिने घेऊन पसार झालेल्या संशयीत आरोपी
संतोष वसंत माळकर मूळ राहणार मळगाव तालुका सावंतवाडी सध्या राहणार शिर्डी यास रत्नागिरी जिल्ह्यात अलोरे पोलीस ठाण्याचे हद्दीत स्थानिक पोलिसांच्या मदतीने मालवण पोलिसांनी ताब्यात घेतले आहे.
दरम्यान, गुन्ह्यातील रोख रक्कम, गुन्ह्यात वापरलेले फोर्ड गाडी  तसेच सोन्याचे व चांदीचे दागिने असे मिळून २ लाख ३५ हजरांचा मुद्देमाल जप्त करण्यात आला आहे. त्याला अटक करून मालवण न्यायालयात हजर केले असता तीन दिवसांची पोलीस कोठडी सुनावण्यात आली आहे. अधिक तपास सुरु असल्याची माहिती मालवण पोलीस निरीक्षक प्रवीण कोल्हे यांनी दिली.

दरम्यान आरोपीने रायगड जिल्ह्यामध्ये पोलादपूर तसेच दादर सागरी पोलीस ठाणे येथेही गुन्हे केल्याचे निष्पन्न झालेले आहे. अशीही माहिती प्राप्त झाल्याचे पोलिसांनी सांगितले. संतोष वसंत माळकर यांच्या पत्नी वरही गुन्हा दाखल असून तिचीही चौकशी सुरु आहे. अशी माहिती मालवण पोलिसांनी दिली.


कांदळगांव येथील रोहन विलास कोदे हे कोल्हापूर येथे गेले असता एका ठिकाणी त्यांची ओळख संतोष माळकर, सायली माळकर यांच्या सोबत झाली. काही दिवसांनी पुन्हा भेट झाली. त्यानंतर आरोपीने कोदे यांना लग्न जुळवून देतो असे सांगून विश्वास संपादन केला. त्यानंतर मुलीला दागिने बनवूया असे सांगून फसवणूक करून कोदे यांच्या आईचे जुने सोन्याचे व चांदीचे सुमारे 82400 किमतीचे दागिने घेऊन पळून गेला होता.सदर नमूद प्रकरणी मालवण  पोलीस ठाण्यामध्ये गुन्हा दाखल झाल्यानंतर पोलीस अधीक्षक डॉ. मोहन दहिकर, अपर पोलीस अधीक्षक श्री कृषिकेश रावले, उपविभागीय पोलीस अधिकारी  श्री घनश्याम आढाव यांनी गुन्ह्याच्या तपासा अनुषंगाने तात्काळ तपास पथक रवाना करणे बाबत आदेश केले होते. वरिष्ठांच्या मार्गदर्शनाखाली तसेच गोपनीय माहितीच्या आधारे पोलीस निरीक्षक श्री प्रवीण कोल्हे, पो. उप.नि. विलास टेंबुलकर, सहाय्यक पोलीस निरीक्षक प्रमोद नाईक, हेमंत पेडणेकर, पोलीस हवालदार धोंडू जानकर सुशांत पवार, सुहास पांचाळ यांनी संशयीत आरोपीला रत्नागिरी येथे प्रवासात ताब्यात घेतले. गोपनीय माहितीच्या आधारे पोलिसांनी कारवाई केली. याप्रकरणी पुढील तपास सुरु आहे. असे पोलिसांनी सांगितले.