घरफोड्यांच्या पार्श्वभूमीवर कुडाळ पोलीसांचे नागरीकांना आवाहन
निलेश जोशी | कुडाळ : सध्या कुडाळ शहरात घरफोडी, चोरीचे प्रमाणात वाढ झालेली आहे. चोरटे बंद घरांना लक्ष्य करीत आहेत. नागरीकांचे मालमत्तेचे रक्षण करणे हे पोलीसांचे आद्य कर्तव्य आहेच परंतु नागरीकांचे जागरूकतेमुळे व मदतीमुळे चोरी घर फोडीच्या गुन्हयांना आळा घालता येईल, चोरी घरफोडीचे गुन्हे उघडकीस आणता येतील. नागरीकांचे मालमत्तेचे रक्षण व्हावे याकरीता कुडाळ पोलीस ठाण्याचे पोलीस निरीक्षक राजेंद्र मगदूम यांनी नागरीकांना सावध राहण्याचे आवाहन केलेले आहे.
प्रसिद्धीस दिलेल्या पत्रकात म्हटले आहे, जे नागरीक आपले घर बंद करुन बाहेर गांवी जाणार आहेत त्यांनी घरात सोन्या, चांदीचे दागिने, मौल्यवान वस्तु अगर रोख रक्कम ठेवुन जावु नये. बाहेरगांवी जाणारे नागरींकनी आपले मौल्यवान वस्तु शक्यतो बँकेच्या लॉकर्स मध्ये सुरक्षीत ठेवावेत. जर आपण बाहेर गांवी जाणार असल्यास त्याबाबतची माहीती आपले शेजाऱ्यांना व पोलीसांना दयावी. काही घरांचा मुख्य दरवाजा हा मजबुत असतो परंतु दरवाजाचा कडी कोयंडा हा घराच्या मुख्य दरवाजांना मजबुत असे कुलुप लावावे. शक्य असल्यास अलार्म करणाऱ्या कुलुपांचा वापर करावा.
आपले परीसरात कोणी संशयीत अनोळखी इसम फिरत असल्यास त्याची माहीती तात्काळ पोलीस ठाण्यात दयावी. आपले घरात किंवा सोसायटी मध्ये कोणी परप्रांतीय इसम भाडयाने राहत असल्यास त्याची सविस्तर माहीती पोलीस ठाण्यास दयावी. शक्य असल्यास आपण राहत असलेल्या परीसरात CCTV कॅमेरे बसवावेत. आपण बाहेर गांवी गेल्यानंतर त्याबाबतचे फोटो तात्काळ फेसबुक, वॉटसअॅप, इंन्टाग्राम अकाऊंट या सारख्या सामाजिक माध्यमावर प्रसारीत करु नयेत. घराचे मुख्य दरवाजाचे बाहेर दुसरा लोखंडी दरवाजा बसवावा. . घराच्या खिडक्यांना मजबुत लोखंडी ग्रील बसवावेत.
काही घरांचा मुख्य दरवाजा मजबुत असतो परंतु मागील दरवाजा हा बऱ्याच वेळा सिमेन्टचा किंवा प्लायवुडचा बसवितात. त्यामुळे चोरटे हे मागील दरवाजा उचकटुन घरात प्रवेश करतात. त्यामुळे मागील दरवाजा हा देखील मजबुत बसवावा. भविष्यात चोरी घर फोडी सारखे गुन्हे घडल्यास घटनास्थळी कोणत्याही वस्तु हाताळू नयेत. तात्काळ पोलीसांना संपर्क साधावा. असे आवाहन कुडाळ पोलिसांकडून करण्यात आले आहे.
