पहिल्याच पावसात धबधबे प्रवाहित; पावसाची रिपरिप सुरूच
पंकज मोरे | वैभववाडी: निसर्गाने मुक्तहस्ते उधळण केलेल्या निसर्गरम्य भुईबावडा व करुळ घाटातील छोटे-मोठे धबधबे प्रवाहित झाले आहेत. पर्यटकांना मोहिनी घालणारा भुईबावडा व करुळ घाटमार्गाची ओळख आहे. सलग दोन दिवस कोसळणाऱ्या पावसामुळे भुईबावडा घाटात धबधबे प्रवाहीत झाले आहेत.
तालुक्यासह जिल्ह्यात गेल्या दोन दिवसापासून जोरदार पाऊस कोसळत आहे. त्यामुळे भुईबावडा व करुळ घाटातील सर्वच धबधबे ओसंडून वाहू लागले आहेत. हिरव्यागार पर्वतरांगा त्यावर पांघरलेल्या धुक्याचा दाट थाट, उंच कड्याकपारीतून खोल दरीत कोसळणारे धबधबे, हिरव्यागार पर्वतरांगेतून नागमोडी वळणे घेत जाणारा रस्ता. घाटामार्गातून अंगाला फडफड झोंबणारा वारा, त्यातूनच अधूनमधून येणाऱ्या पावसाच्या सरी या सर्व निसर्ग सौंदर्याचा आनंद लुटण्यासाठी दरवर्षी दोन्ही घाटात हजारो पर्यटक येत असतात.
भुईबावडा घाटमार्ग ११ कि. मी. अंतराचा असून या घाटमार्गात अनेक छोटे मोठे धबधबे हे पावसाळ्यात ओसंडून वाहतात. भुईबावडा घाट हा नैसर्गिक सौंदर्याने नटलेला घाटमार्ग आहे. मात्र घाटमार्ग अरुंद असल्याने पर्यटकांना अतिशय काळजी घेऊन पर्यटनाचा आनंद घ्यावा लागतो. करुळ घाटमार्गात पर्यटकांना उभे राहण्यासाठी पिकनिक पॉइंट आहे. त्याचप्रमाणे भुईबावडा घाटात असा पॉईंट विकसित करणे गरजेचे आहे.
भुईबावडा घाटमार्गाप्रमाणेच करुळ घाट मार्गातील उंच कड्याकपारीतून छोटे मोठे धबधबे ओसंडून वाहत आहेत. भुईबावडा व करुळ हे दोन्ही घाट वाहतूकीच्या दृष्टीने अतिशय महत्त्वाचे आहेत. त्याचप्रमाणे पर्यटनदृष्ट्या तितकेच महत्त्वाचे आहेत. विशेषतः पावसाळी पर्यटनाला या घाटांना खूपच महत्त्व आहे.
