निसर्गभ्रमंती आणि फुलांच्या रचना कार्यक्रमाचे आयोजन
वेंगुर्ला : वनशक्ती आणि बॅ. बाळासाहेब खर्डेकर महाविद्यालय, वेंगुर्ला यांच्या संयुक्त विद्यमाने आयोजित उन्हाळी शिबिराची उत्साहात सुरुवात झाली. विद्यार्थ्यांमध्ये निसर्गप्रेम जागवण्यासाठी आणि सर्जनशील कौशल्यांना चालना देण्यासाठी या शिबिराचे आयोजन करण्यात आले आहे.
शिबिराची सुरुवात आज सकाळी महाविद्यालयीन परिसरातून निसर्गभ्रमंतीने झाली. विद्यार्थ्यांनी परिसरातील जैवविविधतेचा अभ्यास केला. वृक्ष, फुलझाडे, पक्षी आणि कीटक यांची निरीक्षणे करत त्यांनी निसर्गाशी जवळीक साधली. वनशक्तीच्या कु. करिश्मा मोहिते यांनी पर्यावरण संवर्धनाचे महत्त्व विद्यार्थ्यांना उलगडून सांगितले.
निसर्गभ्रमंतीनंतर ‘फुलांची रचना’ (Flower Arrangement) या कार्यशाळेचे आयोजन करण्यात आले. या कार्यशाळेसाठी डॉ. धनश्री पाटील यांचे मार्गदर्शन लाभले. विद्यार्थ्यांनी विविध प्रकारची फुले, पाने, वेली वापरून आकर्षक रचना तयार केल्या. या माध्यमातून सौंदर्यदृष्टी, संयोजन कौशल्य आणि निसर्गाशी जोडलेली कलात्मकता यांची ओळख झाली.
या शिबिरात पर्यावरण शिक्षण, सर्जनशील उपक्रम, गटचर्चा, हस्तकला आणि अनेक रंजक कार्यशाळांचा समावेश असून पुढील आठवडाभर या उपक्रमांची रेलचेल राहणार आहे.
शिबिराचे उद्घाटन शिबिरात सहभागी झालेल्या विद्यार्थ्यांच्या हस्ते झाले. याप्रसंगी डॉ. धनश्री पाटील यांनी विद्यार्थ्यांना निसर्गप्रेम आणि पर्यावरण संवर्धनासाठी सक्रिय होण्याचे आवाहन केले. वनशक्तीच्या प्रतिनिधी कु. करिश्मा मोहिते यांनी शिबिराचे उद्दिष्ट स्पष्ट करताना सांगितले की, "आजच्या पिढीला निसर्गाशी नाते घट्ट करणे ही काळाची गरज आहे."
शिबिरात स्थानिक विद्यार्थी, स्वयंसेवक आणि पर्यावरणप्रेमींचा सहभाग दिसून आला असून, हे शिबिर एक प्रेरणादायी आणि स्मरणीय अनुभव ठरणार आहे, अशी खात्री आयोजकांनी व्यक्त केली
