सावंतवाडी : सावंतवाडी शहरात नगर पालिकेच्या हद्दीतील जवळपास १२५ होर्डिंग्ज, फ्लेक्स बैनर, पोस्टर्स हटविण्यात आली आहेत. मंगळवारी सायंकाळी उशिरा सावंतवाडी नगरपालिका व पोलीस प्रशासन यांच्या संयुक्त विद्यमाने शहरातील होर्डिंग्ज हटविण्याची मोहीम हाती घेण्यात आली होती. दोन दिवसात जवळपास १२५ होर्डिंग्ज हटविण्यात आले आहेत. आता शहरात होर्डिंग्ज, बॅनर्स, पोस्टर्स लावायचे असतील, तर ऑनलाईन परवानगी घेणे आवश्यक आहे. सावंतवाडी शहरात सहा ठिकाणी होर्डिंग्ज लावण्यासाठी जागा निश्चित करण्यात आल्या आहेत, अशी माहिती नगरपालिका मुख्याधिकारी अश्विनी पाटील यांनी दिली.
शहरात होर्डिंग्ज व बॅनर लावण्यासंदर्भात बैठक घेण्यात आली. या बैठकीला पोलीस निरीक्षक अमोल चव्हाण व सावंतवाडीतील नागरिक उपस्थित होते. सावंतवाडी शहरात सहा ठिकाणी होर्डिंग्ज लावण्यास परवानगी आहे. त्यामध्ये नगरपालिका रस्त्यालगत एसपीके कॉलेज कॉर्नर, नगर परिषद कार्यालय गेट नंबर २ समोरील नगरपरिषद रस्त्यालगत, एसटी स्टैंडसमोरील भिंत, बापूसाहेब महाराज पुतळ्यासमोर रस्त्यालगत, नगर परिषदेच्या मोकळ्या जागेत नगर परिषद रस्त्यालगत, जुना शिरोडा नाका कॉर्नर नगर परिषद रस्त्यालगत, गवळी तिठा परिसर अशी ठिकाणे निश्चित करण्यात आली आहेत. मंगळवारी सायंकाळपासून रात्री दहा वाजेपर्यंत जवळपास २५ बॅनर्स हटविण्यात आले. तर दुसऱ्या दिवशी बुधवारी जवळपास १०० बॅनर्स हटविण्यात आले. एकूण जवळपास १२५ बॅनर्स हटविण्यात आले आहेत. त्यामुळे सावंतवाडी शहर आता बॅनर मुक्त झाले आहे.
