मालवण पंचायत समिती समोर उपसरपंच व सदस्य यांचे उपोषण होते सुरु
मालवण : ग्रामपंचायत कारभाराची चौकशी करून कारवाई करावी यासह अन्य मागण्यांसाठी कोळंब ग्रामपंचायतचे उपसरपंच विजय नेमळेकर यासह ग्रामपंचायत सदस्य मालवण पंचायत समिती समोर उपोषणास बसले होते. दरम्यान गटविकास अधिकारी श्याम चव्हाण, पोलीस निरीक्षक प्रवीण कोल्हे हे उपोषण स्थळी दाखल झाले. तक्रारीच्या अनुषंगाने एक महिन्यात चौकशी करून पुढील कार्यवाही केली जाईल. असे आश्वासन गटविकास अधिकारी श्याम चव्हाण यांनी दिल्यानंतर नेमळेकर व सदस्य यांनी आपले उपोषण स्थगीत केले.
25 जानेवारी 2025 ची ग्रामसभा झालीच नाही, त्याबाबत फेरचौकशी करून कारवाई करावी. ग्रामपंचायत मध्ये झालेल्या अपहाराची कोकण आयुक्तांनी सरपंच, ग्रामसेवक यांना दंडात्मक रक्कम भरणा करण्याचे आदेश दिले होते. मात्र, अद्याप पैसे भरणा न केल्याने त्यांच्यावर फौजदारी गुन्हा दाखल करावा. यांसह अन्य मागणीसाठी कोळंब ग्रामपंचायत उपसरपंच विजय नेमळेकर हे मालवण पंचायत समिती समोर उपोषणास बसले होते. यावेळी संदीप शेलटकर, निखिल नेमळेकर, संतोष परब, दिलीप नेमळेकर, नरहरी प्रभू, विलास धुरी, मीनल परब, संजना शेलटकर, सुजित नेमळेकर, आदी उपस्थित होते.
यावेळी गटविकास अधिकारी श्याम चव्हाण यांनी उपोषणास्थळी भेट दिली. गटविकास अधिकारी दालनात त्यांनी उपोषण कर्त्यांशी चर्चा केली. यावेळी पोलीस निरीक्षक प्रवीण कोल्हे उपस्थित होते. शाम चव्हाण म्हणाले, आपण इथे कालच हजर झालो आहे. त्यामुळे तुमच्या अर्जांची माहिती घेऊन चौकशी करतो. तरी आपण उपोषण मागे घ्यावे अशी विनंती गटविकास अधिकाऱ्यांनी केली. दरम्यान, पोलीस निरीक्षक प्रवीण कोल्हे यांच्या उपस्थितीत गटविकास अधिकारी चव्हाण यांनी चौकशी करण्याचे आश्वासन दिल्यानंतर विजय नेमळेकर यांनी उपोषण स्थगित केले.
