देवली उपसरपंचासह सदस्यांच्या स्वाक्षरीचे तहसीलदारांना पत्र
मालवण | प्रतिनिधी : देवली ग्रामपंचायत सरपंच शामसुंदर वाक्कर यांच्या विरोधात देवली ग्रामपंचायत उपसरपंच हेमंत चव्हाण व सदस्यांनी अविश्वास ठराव मांडण्याबाबतचे नोटीस पत्र तहसीलदार वर्षा झालटे यांना दिले आहे.
देवली ग्रामपंचायत उपसरपंच हेमंत चव्हाण, ग्रामपंचायत सदस्य मेघा पाटकर, सदस्य रुपल आचरेकर, दिपिका सारंग, गणेश आचरेकर, नवनाथ झोरे यांनी तहसील प्रशासनास दिलेल्या पत्रात म्हटले आहे, सरपंचांच्या विरोधात पंचायतीच्या सभेत अविश्वास ठराव मांडू इच्छितो.
सरपंच ग्रामपंचायतीच्या कोणत्याही सदस्याला ग्रामपंचायतीच्या कोणत्याही विकास कामात विचारत न घेता मनमानी कारभार करत आहेत. शासकीय योजनांची माहिती वेळेत न देणे, मासिक सभेमध्ये एकतर्फी निर्णय घेणे, विश्वासात न घेणे, मर्जीतील लाभार्थ्यांना वैयक्तिक योजनेचा लाभ देणे व ग्रामस्थांना योजनेची माहिती विहित वेळेत न देणे या कारणांसाठी देवली सरपंच यांच्याविरुद्ध अविश्वास ठराव मांडण्याबाबतचे नोटीस पत्र मालवण तहसील कार्यालयात देण्यात आले आहे.
