महाराष्ट्राच्या सागरी जलधी क्षेत्रात सिंधुदुर्ग किनारपट्टीवरील मुणगे समोर सुरु होती अनधिकृत मासेमारी
नौका जप्त करून सर्जेकोट बंदरात : नौकेवरील मासळीचा लिलाव करून पुढील कारवाई सुरु
अमित खोत | मालवण : महाराष्ट्राच्या सागरी जलधी क्षेत्रात सिंधुदुर्ग किनारपट्टीवरील मुणगे समोर अनधिकृतरित्या मासेमारी करणाऱ्या कर्नाटक उडपी येथील नौका सिंधुदुर्ग मत्स्य विभागाने कारवाई करतं ताब्यात घेतली आहे. महाराष्ट्र सागरी मासेमारी नियमन अधिनियम १९८१ व सुधारणा अधिनियम २०२१ अंतर्गत ही कारवाई करण्यात आली आहे. मत्स्यविकास व बंदरे मंत्री नितेश राणे यांच्या नेतृत्वात मत्स्य विभागाचा कारभार गतिमान झाला आहे. सोबतच परप्रांतीय अनधिकृत मासेमारी करणाऱ्या नौकांवर ही कारवाईचा धडाका सुरूच आहे.
सोमवार २१ एप्रिल रोजी रात्री मुणगे समोर अठरा वाव खोल समुद्रात अंदाजे ९-१० सागरी मैल दरम्यान मत्स्यव्यवसाय विभागाच्या अंमलबजावणी अधिकारी तथा सहाय्यक मत्स्य. विकास अधिकारी, सिंधुदुर्ग तेजस्विता भ. करंगुटकर, या गस्ती नौकेच्या माध्यमातून नियमित गस्त घालत होत्या. यावेळी कर्नाटक राज्याच्या
जलधी क्षेत्रासाठी परवाना असलेली श्रीम. वेदवती स. पुथरण, रा. मारीकंबा नगर थोत्तम, उडपी, राज्य कर्नाटक
यांची नौका श्री महालक्ष्मी 3 नों. क्र.- IND-KA-२-MM- ६२६८ द्वारे महाराष्ट्रातील जलधी क्षेत्रात मुणगे समोर अनधिकृतरित्या मासेमारी करत असताना पकडली. या नौकेवर नौका तांडेलसह इतर सहा खलाशी
होते. सदर नौका जप्त करून सर्जेकोट बंदरात ठेवण्यात आली आहे. तसेच नौकेवरील मासळीचा लिलाव करण्याची कार्यवाही करण्यात येत होती.
अंमलबजावणी अधिकारी तेजस्विता भ. करंगुटकर, अंमलबजावणी अधिकारी तथा सहाय्यक मत्स्य. विकास अधिकारी, सिंधुदुर्ग यांनी मालवण पोलिस ठाणे येथील पोलिस कर्मचारी अमित हरमलकर तसेच सागरी सुरक्षा पर्यवेक्षक मालवण/सर्जेकोट व रक्षक सागरी सुरक्षा रक्षक मालवण व देवगड यांचे सहकार्याने सहाय्यक आयुक्त मत्स्यव्यवसाय, सिंधुदुर्ग यांच्या मार्गदर्शनाखाली सदर कारवाई केली आहे. अंमलबजावणी अधिकारी यांनी प्रतिवेदन दाखल केल्यानंतर सदर नौकेबाबत सुनावणी सहाय्यक आयुक्त मत्स्यव्यवसाय, सिंधुदुर्ग यांचे न्यायालयात ठेवण्यात येणार आहे.
