सिंधुदुर्ग : महाराष्ट्र भूषण डॉ. श्री नानासाहेब धर्माधिकारी यांच्या जयंतीनिमित्त सिंधुदुर्ग जिल्हा मध्ये महास्वच्छता अभियानाचे आयोजन करण्यात आले आहे. डॉ. श्री नानासाहेब धर्माधिकारी प्रतिष्ठानच्या माध्यमातून वेळोवेळी सामाजिक उपक्रम राबविण्यात येतात. यामध्ये रक्तदान शिबिर, आरोग्य शिबिर, वृक्षारोपण व संवर्धन, विहिरी नद्या साफसफाई ,जल पुनर्भरण, पाणपोई बंधारा उपक्रम, शैक्षणिक साहित्य वाटप व स्वच्छता अभियान असे अनेक समाजपयोगी उपक्रम राबविण्यात येतात. या प्रतिष्ठानच्या वतीने रविवार दिनांक 2 मार्च रोजी सकाळी ८ वाजता सिंधुदुर्ग जिल्ह्यातील आठही तालुक्यांमध्ये स्वच्छता मोहीम राबवण्यात येणार आहे.
ही स्वच्छता मोहीम स्वच्छ भारत अभियानाचे महाराष्ट्र राज्याचे राज्यपालांनी नियुक्त गेलेले स्वच्छता दूत डॉ. श्री नानासाहेब धर्माधिकारी प्रतिष्ठानचे अध्यक्ष पद्मश्री पुरस्कार सन्मानित डॉ. आप्पासाहेब धर्माधिकारी व डॉ. सचिनदादा धर्माधिकारी यांच्या मार्गदर्शनाखाली आयोजित करण्यात आली आहे.
या स्वच्छता अभियानामध्ये सिंधुदुर्ग जिल्ह्यासोबतच महाराष्ट्रातील तसेच देशात व परदेशात देखील विविध शहरांमध्ये हे स्वच्छता अभियान राबविण्यात येणार आहे. या स्वच्छता अभियानामध्ये श्री बैठक मधील हजारोंच्या संख्येने सर्व श्री सदस्य सहभागी होणार आहेत. या स्वच्छता अभियानामध्ये जिल्ह्यातील प्रमुख रस्ते, समुद्र तसेच शासकीय कार्यालय परिसर स्वच्छ करण्यात येणार आहेत तरी या अभियानामध्ये सर्व नागरिकांनी सहभागी व्हावे, असे प्रतिष्ठानच्या वतीने आवाहन करण्यात आले आहे.
