कुंभारमाठ येथे मध्यरात्री घडली घटना
सात संशयितांवर गुन्हे दाखल ; एकजण पोलिसांच्या ताब्यात
मालवण | प्रतिनिधी : कुंभारमाठ येथील खालसा ढाब्यावर मध्यरात्रीच्या वेळी जेवण दिले नाही या रागातून काही तरुणांच्या जमावाने हॉटेल मालक व कामगारांना लाथाबुक्क्यानी व बटलीने मारून गंभीर दुखापत केली. हॉटेल मधील साहित्याची तोडफोड करून मोबाईलही आपटून फोडला. तसेच त्यांच्या गळ्यातील सोन्याच्या चैन व अंगठी जबरीने चोरून नेताना ठार मारण्याची धमकी दिली. या प्रकरणी ढाबा मालक बलजिंदर निर्मल सिंह मूळ रा. राजस्थान यांनी मालवण पोलिस ठाण्यात दिलेल्या तक्रारीनुसार संशयित आरोपी वैभव मयेकर (रा. धुरीवाडा मालवण) याच्यासह अनोळखी सहा जणांविरुद्ध विविध कलमानुसार गुन्हे दाखल करण्यात आला आहेत. अशी माहिती मालवण पोलीस निरीक्षक प्रवीण कोल्हे यांनी दिली. मालवण कुंभारमाठ येथील खालसा धाब्यावर सोमवारी रात्री १२: ४५ वा. सुमारास वैभव मयेकर व अन्य सहा जण जेवण करण्यासाठी गेले होते मात्र हॉटेल बंद झाले असल्याने जेवण दिले नाही. यां रागातून संशयीत तरुणांनी हॉटेलचे मालक बलजिंदर निर्मल सिंह, कामगार प्रदीप उगले यांना गंभीर मारहाण केली. हॉटेलच्या साहित्याची तोडफोड करत सोन्याच्या दागिन्यांचीही चोरी केली. उद्यापासून हॉटेल बंद करायचे नाहीतर तुम्हांला जिवंत सोडणार नाही. अशी धमकीही यावेळी देण्यात आली. याप्रकरणी प्राप्त तक्रारीनुसार गुन्हा दाखल करण्यात आला आहे. संशयित वैभव मयेकर याला पोलिसांनी ताब्यात घेतले आहे. अधिक तपास पोलीस निरीक्षक प्रवीण कोल्हे यांच्या मार्गदर्शनाखाली पोलीस उपनिरीक्षक एस. एस. खाडे करत आहेत.
