मालवण येथील तरुणांचे पोलिसांना निवेदन
मालवण : मालवण बस डेपो समोर एक फळ विक्रेता गुटखा खाऊन फळांवर थुंकताना सापडला, या घटनेचे गांभीर्य लक्षात घेऊनच मालवण पोलीस स्टेशनमध्ये अधिकृत नोंद असलेल्या तसेच अधिकृत परवाने असणाऱ्या व्यक्तींना वगळता सर्व अनधिकृत फळ विक्रेत्यांवर सरसकट कारवाई करण्यात यावी, असे निवेदन मालवण मधील तरुण सामाजिक कार्यकर्ते यांच्या वतीने मालवण पोलीस स्टेशनमध्ये तसेच मालवण नगरपरिषद प्रशासनासही देण्यात आले आहे.
घडलेल्या प्रकारामुळे फळ विक्रेत्यांवरील नागरिकांची विश्वासार्हता तर कमी झाली आहे, तसेच नागरिकांच्या आरोग्याचा देखील प्रश्न उदभवला आहे.
फळ विक्रेते शहरातील वेगवेगळ्या ठिकाणी रस्त्यावर आपली हातगाडी लावून फळे विकतात, त्यामुळे सततच्या वाहतूक कोंडीच्या त्रासाला मालवणवासियांना सामोरे जावे लागते. अधिकृत फेरीवाले किती ह्याची कोणालाच माहिती नसते, घडलेला प्रकार हा संतापजनक आहे, भविष्यात असे प्रकार घडत राहिल्यास नागरिकांकडून तीव्र प्रतिक्रिया येतील, त्याआधीच आपण फक्त अधिकृत नोंद असलेल्या तसेच मालवण पोलीस स्थानकात ज्या व्यक्तींची नोंद आहे अशा अधिकृत परवाने असणाऱ्या व्यक्तींना वगळता सर्व अनधिकृत फळविक्रेत्यांवर सरसकट कारवाई करावी. मात्र हि कारवाई 'मी मारतो तू लागल्यासारखं कर' अशी असू नये तर कठोर स्वरूपात असावी जेणेकरून असले प्रकार पुन्हा होणार नाहीत व मालवणातील रस्ते देखील वाहतूक कोंडीतून मुक्त होतील असे मागणी निवेदन मालवण पोलीस स्टेशनमध्ये देण्यात आले आहे. तसेच मालवण नगरपरिषद प्रशासनासही देण्यात आले आहे.
