शेतकऱ्यांमधून मांडली जात आहे भुमिका
सिंधुदुर्ग : सिंधुदुर्ग जिल्ह्यात शेती हंगाम सुरु आहे. भात, भुईमूग, चवळी आदी शेतीपीक घेतले जात आहे. मात्र गेल्या काही वर्षांपासून गवेरेडे, डुक्कर व अन्य जंगली प्राणी शेतीचे मोठे नुकसान करत आहेत. या जंगली प्राण्यांना पळवून लावण्यासाठी शेतकऱ्यांना शेती संरक्षण बंदूका दिल्या जातात. मात्र सध्यस्थितीत ऐन शेती हंगामात या बंदूका जमा करण्याचे आदेश शेतकऱ्यांना प्रशासनाने दिले आहेत. निवडणुक पार्श्वभूमीवर घेण्यात आलेला हा निर्णय असला तरी याचा परिणाम शेती हंगामावर होऊ शकतो. नेहमी प्रशासनाच्या नियमांचे पालन करणारे, कोणतेही गुन्हे दाखल नसलेले व राजकारण या पासूनही दूर असलेले अनेक शेतकरी यांना या निर्णयाचा फटका बसण्याची शक्यता वर्तवली जात आहे.
शेत पिके बहरात आली आहेत. त्यात पावसाने शेतकऱ्यांची चिंता वाढवली आहे. तर जंगली प्राणी शेतीत घुसून नुकसान करत आहेत. त्यांना पळवून लावण्यासाठी हवेत गोळीबार करण्यासाठी शासन नियमानुसार शेतकरी बंदूका वापरतात मात्र या बंदूका जमा केल्यास त्याचा परिणाम शेती संरक्षण करण्यावर होणार आहे. प्रशासनाने याबाबत विचार करावा. शेतकऱ्यांच्या शेतीच्या दृष्टीने विचार झाल्यास शेतकऱ्यांना दिलासा ठरेलं. शेतकऱ्यांची भुमिका निवडणुक विभाग, वरिष्ठ प्रशासन यापर्यत पोहचवावी. ते निश्चितच सकारात्मक विचार करतील. अशी भुमिका काही शेतकरी यांच्या वतीने चर्चेतून मांडली आहे.
