स्थायी समितीही निश्चित होणार
मालवण | प्रतिनिधी : मालवण नगरपरिषद स्थायी समिती गठीत करणे तसेच बांधकाम, स्वच्छता व आरोग्य, पाणीपुरवठा तसेच महिला बालकल्याण समिती सभापती व महिला बालकल्याण उपसभापती निवड आज होणार आहे. नगराध्यक्षा ममता वराडकर स्थायी समितीच्या पदसिद्ध अध्यक्ष असणार आहेत.
बुधवारी सकाळी 11 वा. मालवण नगरपरिषद सभागृहात विशेष सभेचे आयोजन करण्यात आले असून मुख्याधिकारी पिठासीन अधिकारी म्हणून काम पाहणार आहेत. समिती व सदस्य नावे निश्चिती तसेच सभापती व उपसभापती निवडणूक, निवड कार्यक्रम होणार आहे.
मालवण नगरपरिषदेत शिवसेनेची सत्ता आहे. त्यामुळे शिवसेनेचे वर्चस्व स्थायी समिती आणि सभापती निवडीत दिसून येणार आहे. मित्रपक्ष भाजपालाही या समितीत स्थान मिळणार आहे अशी शक्यता आहे.
आमदार निलेश राणे यांच्या मार्गदर्शनात स्थायी समिती सदस्य व सभापती, उपासभाती निवड बाबत शिवसेना सर्व नगरसेवक यांची चर्चा झाली. आमदार निलेश राणे, जिल्हाप्रमुख दत्ता सामंत यांच्या मार्गदर्शनात नावे निश्चित करण्यात आली.
उपनगराध्यक्ष दिपक पाटकर पाणीपुरवठा समिती सभापती, नगरसेवक सहदेव बापार्डेकर बांधकाम सभापती, नगरसेविका पूनम चव्हाण स्वच्छता व आरोग्य सभापती, नगरसेविका अन्वेषा आचरेकर महिला व बालकल्याण सभापती तर उपसभापती म्हणून नगरसेविका अश्विनी कांदळकर यांच्या नावांची चर्चा आहे. बुधवारी सभेत अधिकृतरित्या नावे निश्चित होणार आहेत.
