मतमोजणीसाठी निवडणूक यंत्रणा सज्ज : जिल्हा परिषद 6 व पंचायत समिती 11 जागांच्या निकालाची प्रतीक्षा
मालवण | प्रतिनिधी : मालवण तालुक्यात जिल्हा परिषद व पंचायत समिती निवडणुकीची मतमोजणी प्रक्रिया सोमवार 9 फेब्रुवारी रोजी सकाळी 10 वाजता शासकीय तंत्रनिकेतन कुंभारमाठ मालवण येथे सुरू होणार आहे. निवडणूक निर्णय अधिकारी शारदा पोवार यांच्या नेतृत्वाखाली मतमोजणीसाठी निवडणूक यंत्रणा सज्ज झाली आहे.
मालवण तालुक्यातील जिल्हा परिषदच्या सहा तर पंचायत समितीच्या 11 जागांसाठी शनिवारी मतदान प्रक्रिया पार पडली. तालुक्यातील सुमारे 44 हजार मतदारांनी मतदानाचा हक्क बजावला. 58.90 टक्के मतदान झाले. आता मतमोजणीची उत्सुकता सर्वाना लागली आहे. आडवली मालडी पंचायत समिती बिनविरोध ठरली असून भाजपा शिवसेना महायुतीच्या सीमा परुळेकर या बिनविरोध विजयी झाल्या. त्यामुळे महायुतीने विजयाचे खाते खोलले आहे.
सोमवारी सकाळी 10 वाजता शासकीय तंत्रनिकेतन कुंभारमाठ मालवण येथे मतमोजणी होणार आहे. मोबाईल व अन्य इलेक्ट्रॉनिक साधने मतमोजणी केंद्रावर नेण्यास परवानगी नाही. मतमोजणी केंद्रावर जाणाऱ्या उमेदवार व प्रतिनिधी यांनी याची नोंद घ्यावी. असे आवाहन मालवण तहसीलदार गणेश लव यांनी केले आहे.
मालवण शासकीय तंत्रनिकेतन येथे 10 वाजता सुरू होणार मतमोजणी
