सर्जेकोट मिर्याबांदा 'सखी' मतदान केंद्र ठरले विशेष!

मतदान केंद्रावर सर्व महिला अधिकारी, कर्मचारी नियुक्त

महिला मतदारांची सर्वाधिक संख्या : उत्स्फूर्त मतदान

मालवण | प्रतिनिधी : प्राथमिक शाळा सर्जेकोट मिर्याबांदा याठिकाणी उपजिल्हाधिकारी तथा मालवण निवडणूक निर्णय अधिकारी शारदा पोवार यांच्या संकल्पनेतून आणि मार्गदर्शनात सखी मतदान केंद्र करण्यात आले. सखी केंद्रावर केंद्रअध्यक्षा, अधिकारी, कर्मचारी अश्या सर्व महिला यठिकाणी कार्यरत असून महिला ही सक्षमपणे मतदान केंद्र सांभाळू शकतात हे यातून सिद्ध होते. मतदारांचा उत्साह वाढावा मतदान केंद्रावर प्रसन्न आणि आनंदी वातावरण असावे या उद्देशाने विशेष सजावट या मतदान केंद्रावर करण्यात आली होती.


मालवण तालुक्यातील प्राथमिक शाळा सर्जेकोट मिर्याबंदा येथे सखी मतदान केंद्र आहे. याठिकाणी भेट देत उपजिल्हाधिकारी तथा मालवण निवडणूक निर्णय अधिकारी शारदा पोवार यांनी आढावा घेतला. तसेच आवश्यक सूचना व मार्गदर्शन अधिकाऱ्यांना केले.

यावेळी मतदान केंद्र अध्यक्ष डॉ. सुमेधा नाईक यांसह मतदान अधिकारी अनुष्का कदम, मतदान अधिकारी राधा दिघे, मतदान अधिकारी शुभांगी लोकरे तसेच कर्मचारी सिमाली परब, सखी केंद्र झोनल अधिकारी श्वेता यादव तसेच क्षेत्रीय झोनल अधिकारी मकरंद कुलकर्णी उपस्थित होते. तालुक्यातील एकमेव महिला केंद्रअध्यक्षा म्हणून डॉ. सुमेधा नाईक या कार्यरत आहेत.

सर्जेकोट केंद्रावर 838 मतदार

प्राथमिक शाळा सर्जेकोट मिर्याबंदा येथे सखी मतदान केंद्र याठिकाणी 838 मतदार आहेत. यात महिला मतदारांची सर्वाधिक असून 423 महिला मतदार आहेत. तर पुरुष मतदारांची संख्या 415 आहे.

महिला सक्षमिकरण

महिला सक्षमिकरण या हेतूने सखी मतदान हे केंद्र स्थापन करण्यात आले आहे. या केंद्रावर सर्व महिला अधिकारी असून येथे महिला मतदारांची संख्या सर्वाधिक आहे. शांततेत मतदान प्रक्रिया सुरु होती. एकूणच मालवणातील सर्व मतदान केंद्रावर निवडणुक विभाग लक्ष ठेवून आहे. तसेच सर्व ठिकाणी पोलीस बंदोबस्त तैनात ठेवण्यात आला आहे.

अमित खोत, मालवण