मालवण | प्रतिनिधी : निवडणूक प्रक्रियेत सहभागी असणाऱ्या मालवण तालुक्यातील शासकीय कर्मचारी यांनी शनिवारी मामा वरेरकर नाट्यगृह याठिकाणी जिल्हा परिषद आणि पंचायत समितीसाठी टपाली मतदान केले.
मालवण नाट्यगृह याठिकाणी खास मतदान कक्ष स्थापन करण्यात आला होता. जिल्हा परिषद आणि पंचायत समितीसाठी ७ फेब्रुवारी रोजी मतदान होणार आहे. यामध्ये शासकीय कर्मचारी मतदान केंद्रावर अधिकारी, कर्मचारी म्हणून नियुक्त असल्याने त्यांना टपाली मतदानाचा अधिकार उपलब्ध करून देण्यात आलेला होता. यामुळे कर्मचाऱ्यांना निवडणुकीसाठी पहिल्या नंबरने मतदान करण्याचा अधिकार मिळाला होता.
राज्य निवडणूक आयोग, महाराष्ट्र यांचेकडून जिल्हा परिषद पंचायत समिती सार्वत्रिक निवडणूक २०२६ चे निवडणूकीची घोषणा करण्यात आलेली आहे. त्यानुषंगाने जिल्हा परिषद व पंचायत समिती सार्वत्रिक निवडणूक २०२६ चे कामी नियुक्त केलेल्या मतदान केंद्रनिहाय केंद्राध्यक्ष, मतदान अधिकारी १, मतदान अधिकारी २ व ३, व अन्य नियुक्त अधिकारी / कर्मचारी (क्षेत्रिय अधिकारी, पोलीस, आरटीओ व होमगार्ड) यांना प्रशिक्षणाचा दुसरा टप्पा मामा वरेरकर नाटयगृह, मालवण येथे शनिवारी घेण्यात आला. याचवेळी टपाली मतदान सुविधा कक्ष स्थापन करण्यात आला होता. निवडणूक कामी नियुक्ती अधिकारी / कर्मचारी पीबी-१ फॉर्म जमा केला असलेल्या कर्मचारी यांनी टपाली सुविधा कक्षामध्ये उपस्थित राहून मतदान केले. यात १२४ पैकी १०९ कर्मचाऱ्यांनी यात सहभागी होत मतदानाचा हक्क बजावला.
मालवण निवडणूक निर्णय अधिकारी भूसंपादन उपजिल्हाधिकारी शारदा पोवार, तहसीलदार गणेश लव्हे, कणकवली गटविकास अधिकारी अरूण चव्हाण, मालवण गटविकास अधिकारी शाम चव्हाण यावेळी उपस्थित होते. यावेळी कर्मचारी वर्गाला निवडणूक निर्णय अधिकारी शारदा पोवार यांनी मार्गदर्शन केले.
