आमदार निलेश राणे यांच्या पाठपुराव्याला यश

कुडाळ मालवण मतदारसंघातील १२ हजार शेतकऱ्यांसाठी २.७९ कोटींची नुकसानभरपाई !

मालवण : ऑक्टोबर महिन्यात सिंधुदुर्ग जिल्ह्यात झालेल्या अतिवृष्टीमुळे नुकसान झालेल्या शेतकर्‍यांना दिलासा देण्यासाठी अखेर शासनाने नुकसानभरपाई जाहीर केली आहे. विशेष म्हणजे, सिंधुदुर्ग जिल्ह्यासाठी मंजूर झालेल्या एकूण ४ कोटी रुपयांच्या भरपाईपैकी ५० टक्क्यांहून अधिक, म्हणजेच तब्बल २ कोटी ७९ लाख ६० हजार ७५५ रुपयांची विक्रमी भरपाई एकट्या कुडाळ मालवण विधानसभा मतदारसंघासाठी मंजूर झाली आहे.
आमदार निलेश राणे यांनी नुकसानग्रस्त शेतकऱ्यांना न्याय मिळवून देण्यासाठी केलेल्या प्रभावी आणि सातत्यपूर्ण पाठपुराव्याचे हे मोठे यश मानले जात आहे.
ऑक्टोबर महिन्यात जिल्ह्यात अनेक ठिकाणी अतिवृष्टी झाली होती, ज्यामुळे भातशेती, फळपिके आणि इतर शेतमालाचे मोठे नुकसान झाले. या नुकसानीची पाहणी तातडीने व्हावी आणि जास्तीत जास्त शेतकरी भरपाईपासून वंचित राहू नयेत यासाठी आमदार निलेश राणे यांनी प्रशासनाला थेट आदेश दिले होते. त्यांनी स्वतः अनेक भागांमध्ये भेट देऊन पंचनाम्यांच्या कामाचा आढावा घेतला आणि महसूल तसेच कृषी विभागाला सर्वसमावेशक पंचनामे करण्याचे निर्देश दिले होते.
याच पाठपुराव्याचा परिणाम म्हणून, आज जाहीर झालेल्या नुकसानभरपाईच्या आकडेवारीतून कुडाळ मालवण मतदारसंघातील नुकसानीची खरी व्याप्ती समोर आली आहे.
सिंधुदुर्ग जिल्ह्यासाठी एकूण ४ कोटी रुपयांची नुकसानभरपाई जाहीर झाली आहे. यापैकी कुडाळ तालुका: ८,८९१ शेतकरी, मालवण तालुका: ३,१२२ शेतकरी असे कुडाळ मालवण मतदारसंघातील एकूण शेतकरी: १२,०१३ त्यात मंजूर नुकसानभरपाई २ कोटी ७९ लाख ६० हजार ७५५ रुपये.
जिल्ह्याच्या एकूण भरपाईच्या तुलनेत, कुडाळ मालवण मतदारसंघाला ५० टक्क्यांहून अधिक वाटा मिळाला आहे. ही भरपाई थेट १२ हजार १३ शेतकऱ्यांच्या खात्यावर जमा होणार असून, यामुळे अतिवृष्टीमुळे आर्थिक अडचणीत सापडलेल्या शेतकरी कुटुंबांना मोठा आधार मिळणार आहे.

या भरपाईच्या घोषणेनंतर आमदार निलेश राणे यांनी प्रतिक्रिया व्यक्त करताना सांगितले की, "शेतकऱ्यांचे नुकसान झाले, तेव्हाच मी त्यांना न्याय मिळवून देण्याचे आश्वासन दिले होते. त्यानुसार, प्रशासनाकडे सातत्याने पाठपुरावा केला. आज कुडाळ मालवण मतदारसंघाला जिल्ह्यामध्ये सर्वात मोठी नुकसानभरपाई मिळाली आहे. ही रक्कम लवकरच शेतकऱ्यांच्या बँक खात्यात जमा होईल. नैसर्गिक आपत्तीमुळे नुकसान झालेल्या प्रत्येक घटकाला न्याय देण्यासाठी आम्ही कटिबद्ध आहोत."
या विक्रमी नुकसानभरपाईमुळे आमदार राणे यांच्या 'शेतकरी हिता'च्या भूमिकेवर पुन्हा एकदा शिक्कामोर्तब झाले आहे.