श्री. रामेश्वर मच्छिमार सहकारी सोसायटी लि.दांडी मालवण यांच्या वतीने करण्यात आली मागणी
मालवण | प्रतिनिधी : आउट बोर्ड (OBM) नौका धारकांसाठी पेट्रोलच्या खरेदीवर राज्य शासनाकडून अनुदान मिळावे. अशी मागणी श्री. रामेश्वर मच्छिमार सहकारी सोसायटी लि. दांडी मालवण यांच्या वतीने करण्यात आली आहे. सहाय्यक आयुक्त मत्स्यव्यवसाय सिंधुदुर्ग यांच्याकडे याबाबत निवेदन देण्यात आले आहे.
दिलेल्या निवेदनात म्हटले आहे, पारंपारिक मच्छिमारांच्या यांत्रिक (OBM) नौकांसाठी गोवा राज्यशासन आउटबोर्ड (OBM) नौका धारकांसाठी पेट्रोल पंपावरुन पेट्रोल खरेदीसाठी वार्षिक १७०० लिटर मर्यादेपर्यंत रु. ३० प्रतिलिटर व गुजरात राज्यशासन आउटबोर्ड (OBM) नौकाधारकांसाठी वार्षिक १५०० लिटर मर्यादेपर्यंत रु. ५० प्रतिलिटर याप्रमाणे अनुदान देण्यात येते. गोवा व गुजरात या दोन राज्यांच्या धर्तीवर महाराष्ट्र शासनाच्या मत्स्यव्यवसाय विभागाने अनुदान दिल्यास मच्छिमारांना मच्छिमारी व्यवसाय करण्यासाठी आर्थिक पाठबळ मिळेल.मच्छिमारांच्या आउटबोर्ड (OBM) नौकाधारकांचे परवाना व विमा हे अद्यावत राहतील व त्यामुळे ते कुठच्याही योजना / नुकसान भरपाई पासून वंचित राहणार नाही. अशी मागणी करण्यात आली आहे. सहाय्यक आयुक्त यांच्या सोबत चर्चा करण्यात आली. तसेच जिल्ह्यातील इतर मच्छीमार संस्थानी याबाबत पुढाकार घेण्याचे आवाहन श्री. रामेश्वर मच्छिमार सहकारी सोसायटी लि. दांडी मालवण यांच्या वतीने करण्यात आले आहे.
यावेळी चेअरमन जगदीश एकनाथ खराडे, व्हा. चेअरमन हेमंत जोशी, सेक्रेटरी सतेजा वायंगणकर, तज्ञ संचालक अक्षय रेवंडकर, संचालक - संतोष ढोके, दिलीप पराडकर, रविंद्र चांदेरकर, तुषार आचरेकर, जीवन भगत, पंकज सादिये, प्रवीण मेस्त, रुपेश साळगावकर, मृणाली कोयंडे, अर्चना आचरेकर आदी उपस्थित होते.
