संशयीतातर्फे ॲड. स्वरुप नारायण पई, ॲड. अंबरीष गावडे यांनी काम पाहिले
आचरा : कालावल खाडी येथे अवैध उपसा केलेली वाळू विनापरवाना वाहतुक प्रकरणात पकडलेले संशयीत डंपर चालक दत्तराज राजन बोडेकर (वय 26) रा. साटेली भेडशी ता. दोडामार्ग, विठ्ठल पांडाप्पा राठोड, (वय 27) रा. गुढीपूर पिंगुळी ता. कुडाळ आणि गुंडप्पा नंदाप्पा राठोड (वय 32) रा. सांगिर्डेवाडी, कुडाळ यांना मे. प्रथमवर्ग न्यायदंडाधिकारी साहेब मालवण यांनी प्रत्येकी रक्कम रु. 15,000/- चा सशर्त जामीन मंजूर केला. संशयीतांतर्फे ॲड. स्वरुप नारायण पई, ॲड. अंबरीष गावडे यांनी काम पाहिले.
9 ऑगस्ट 2025 रोजी 4. 40 वाजता मे. मसुरे मंडळ अधिकारी यांनी बांदिवडे मळावाडी येथे केलेल्या कारवाईत दत्तराज राजन बोडेकर, विठ्ठल पांडाप्पा राठोड, गुंडप्पा नंदाप्पा राठोड हे संशयीत त्यांचे ताब्यातील डंपर मधून वाळू वाहतुक करत असल्याचे निदर्शनास आल्यावर सदर डंपर ताब्यात घेऊन संबंधित डंपर चालकांवर आचरा पोलिस ठाण्यात 10 ऑगस्ट 2025 रोजी तक्रार नोंद करण्यात आली. त्यानंतर आचरा पोलिसांनी पोलिस ठाण्यात भारतीय न्याय्य संहिता कलम 303(2), 3(5) अन्वये गु.र. नं. 41/2025 नोंद केला. त्यानुसार केलेल्या पोलिस कारवाईत संशयीत डंपर चालकांना पोलिसांनी दि. 11 ऑगस्ट 2025 रोजी अटक करून ताब्यात घेतले होते.
प्राथमिक तपासकाम व गुन्ह्यामधील वाहने व वाळू रितसर जप्त करून सर्व अटक संशयीतांना पोलिसांनी मे. प्रथमवर्ग न्यायदंडाधिकारी मालवण यांचे न्यायालयात त्याच दिवशी हजर करण्यात आले. अधिक तपासाकरिता मालवण पोलिसानी सर्व संशयितांची 3 दिवसांच्या पोलिस कस्टडीची मागणी केली होती. मात्र आवश्यक रिकव्हरी पूर्ण झाली असल्याने व प्राथमिक तपासकाम पूर्ण झाले असल्याच्या कारणास्तव मे. न्यायालयाने पोलिसांची पोलीस कस्टडीची मागणी फेटाळून संशयीताना न्यायालयीन कोठडी मंजूर केली.
त्यानंतर संशयीतांतर्फे केलेल्या जामीन अर्जाचे सुनावणीअंती मे. न्यायालयाने संशयितांना प्रत्येकी रक्कम रु. 15,000/- चा सशर्त जामीन मंजूर केला.
