मालवण : राष्ट्रीय शिक्षण धोरण २०२० ला पाच वर्षे पूर्ण होत असल्याच्या निमित्ताने, 'अखिल भारतीय शिक्षा समागम (ABSS) २०२५' अंतर्गत पंचायत समिती मालवण शिक्षण विभाग आणि RBSK ग्रामीण रुग्णालय मालवण यांच्या संयुक्त विद्यमाने विशेष गरजाधारक विद्यार्थ्यांसाठी तालुकास्तरीय UDID (Unique Disability ID) शिबिर आयोजित करण्यात आले.
या शिबिरामध्ये तालुक्यातील विविध शाळांमधील विशेष गरजा असलेल्या विद्यार्थ्यांची तपासणी करून त्यांना UDID कार्ड मिळवून देण्यासाठी आवश्यक प्रक्रिया पूर्ण करण्यात आली. या शिबिरामुळे अनेक विद्यार्थ्यांना शासनाच्या विविध योजनांचा लाभ मिळवण्यासाठी आवश्यक असलेले UDID कार्ड मिळण्यास मदत झाली आहे.
यावेळी मालवण तालुका गटशिक्षणाधिकारी संजय माने, विषय तज्ज्ञ गौरी नार्वेकर, आरती कांबळी, ममता जोगल, विशेष तज्ज्ञ विकास रुपनर, स्वप्नील पाटणे, विशेष शिक्षक नितीन पाटील, महेश चव्हाण, हनुमंत तावडे, वरिष्ठ सहाय्यक वैभव वाघाटे व इतर कर्मचारी अजिंक्य चोडणकर, प्रणय साटम, RBSK ग्रामीण रुग्णालयाचे डॉक्टर आणि कर्मचारी उपस्थित होते.
विद्यार्थ्यांची वैद्यकीय तपासणी करून आवश्यक कागदपत्रे जमा केली. शिबिरात विद्यार्थ्यांसह त्यांचे पालकही मोठ्या संख्येने उपस्थित होते. या उपक्रमामुळे विशेष गरजाधारक विद्यार्थ्यांना मुख्य प्रवाहात आणण्यासाठी आणि त्यांना सर्व सुविधा मिळवून देण्यासाठी शासनाचा प्रयत्न आहे. अशा प्रकारच्या शिबिरांमुळे दिव्यांग विद्यार्थ्यांना शिक्षणासह इतर क्षेत्रांतही प्रगती करण्यासाठी प्रोत्साहन मिळेल.
