परशुराम उपरकर यांचा इशारा
पिंगुळी बनलेय अंमली पदार्थांचे हब : उपरकर
निलेश जोशी | कुडाळ : सिंधुदुर्ग जिल्ह्यातून अमली पदार्थ, जुगार अनैतिक धंदे बंद करण्याच्या पालकमंत्र्यांच्या आदेशाला पोलीस व प्रशासनाने केराची टोपली दाखवली आहे हे दिसून आले आहे. अमली पदार्थ साठा करणारे टोळीचे जाळे हे जिल्हा अंतर्गत, जिल्हा बाहेर व राज्याच्या बाहेर अशी तीन प्रकारची गॅंग कार्यरत असल्याचे उबाठा शिवसेना नेते तथा माजी आमदार परशुराम उपरकर यांनी सांगितले. कुडाळ येथे ते पत्रकार परिषदेत बोलत होते.
या विरोधात जनतेला सोबत घेऊन घेऊन रस्त्यावर उतरु असा इशारा सुद्धा त्यांनी दिला.
सिंधुदुर्गातून गोव्यात अंमली पदार्थाची वाहतूक करतानाची पहिली मोठी कारवाई बांदा येथे झाली. आजची तरुण पिढी ही अमली पदार्थ व अनैतिक धंद्याच्या विळख्यात सापडलेली आहे, या अनुषंगाने आज श्री उपरकर यांनी येथील शिवसेना शाखेत आज पत्रकार परिषद घेतली. यावेळी तालुकाप्रमुख राजन नाईक, युवा सेना जिल्हाप्रमुख मंदार शिरसाठ, अतुल बंगे, संतोष शिरसाट, दीपक गावडे, बाबल गावडे, कृष्णा धुरी, गोट्या चव्हाण, नितीन सावंत आदी उपस्थित होते.
यावेळी बोलताना श्री उपरकर म्हणाले, जिल्ह्यातील अंमली पदार्थ व अनैतिक धंदे बंद करण्याच्या दृष्टिकोनातून पालकमंत्र्यांनी जो आदेश दिला होता त्या आदेशाला पोलीस व प्रशासनाने केराची टोपली दाखविल्याचे सर्रास दिसत आहे. या ठिकाणी पालकमंत्री सपशेल फेल ठरले आहेत. जिल्ह्यात राजरोसपणे अमली पदार्थ वाहतूक अनैतिक धंदे होत आहेत. कुडाळ तालुक्यातील पिंगुळी हे अंमली पदार्थाचे हब बनलेले आहे. कुडाळमधून अमली पदार्थांचा पुरवठा केला जात आहे. मात्र पोलीस कोणतीही कारवाई करीत नाहीत. एमआयडीसी येथे अनेक परप्रांतीय भंगारच्या नावाखाली ड्रग्स दारूचा धंदा मोठ्या प्रमाणात करत आहेत. आलिशान गाड्यामधून ही वाहतूक मोठ्या प्रमाणात होत असताना पोलीस यंत्रणेतून कोणतीच कारवाई होत नाही. एकदरीच दिवसाढवळ्या सुरू असणाऱ्या या अमली पदार्थ वाहतुकीला पोलिसांची भीती नसल्याचे चित्र यावेळी दिसत आहे. जिल्हा अंतर्गत, जिल्हा बाहेर व राज्याच्या बाहेर अशा तीन गँग या ठिकाणी वावरत आहेत. पालकमंत्री यांच्या आदेशानुसार मधल्या काळात जुगार आठ दिवस बंद केला गेला. मात्र हाच जुगार मटका पुन्हा जोमाने सुरू असून आजची तरुण पिढी ही व्यसनाधीन झाली आहे. म्हापण मध्ये जी दारू पकडली ती एका बीजेपीच्या कार्यकर्त्याची होती, असे श्री उपरकर यांनी सांगितले. दरम्यान या अंमली पदार्थ, जुगार,मटका अनैतिक धंदे या विरोधात जनतेला सोबत घेऊन शिवसेना रस्त्यावर उतरेल असा इशारा श्री उपरकर यांनी दिला.
