मालवण : मालवण बस स्थानकाच्या जुन्या इमारतीचा स्लॅब कोसळून महिला प्रवाशी जखमी झाल्याच्या दुर्घटनेनंतर मनसे जिल्हा उपाध्यक्ष गणेश वाईरकर यांच्या नेतृत्वाखालील शिष्टमंडळाने याठिकाणी भेट देऊन पाहणी केली. यावेळी धोकादायक इमारतीत प्रवाशांना प्रवेश न देण्याची मागणी करण्यात आली. एसटी प्रशासनाने या मागणीची तात्काळ दखल घेत धोकादायक भाग तात्काळ बंदिस्त केला आहे.
बुधवारी सकाळच्या वेळी मालवण बस स्थानक येथील धोकादायक झालेल्या इमारतीच्या स्लॅबचा भाग कोसळून एक महिला गंभीररित्या जखमी झाली. याची दखल घेत मनसे उपजिल्हाध्यक्ष गणेश वाईरकर यांनी आपल्या पदाधिकाऱ्यांसमवेत तत्काळ बस स्थानक गाठले आणि सदर प्रकारचा जाब विचारला. तसेच धोकादायक इमारतीमध्ये प्रवाशांना प्रवेश देऊ नये अशी मागणी केली. वाईरकर यांच्या सूचनेची एसटी प्रशासनाने तत्काळ दखल घेऊन धोकादायक भाग बंदिस्त केला. यावेळी मनसे शहराध्यक्ष सागर जाधव, अमित इब्रामपुरकर, गुरु तोडणकर, टिंकू माणगावकर, अनिल चव्हाण आदी पदाधिकारी आणि महाराष्ट्र सैनिक उपस्थित होते.
