मालवण टोपीवाला बोर्डिंग मैदान स्पर्धेचा थरार
पालकमंत्री नितेश राणे यांची प्रमुख उपस्थिती
मालवण | प्रतिनिधी : सिंधुदुर्ग जिल्हा बार असोसिएशन आणि ॲड संग्राम देसाई माजी अध्यक्ष तथा विद्यमान सदस्य बार कौन्सिल ऑफ महाराष्ट्र आणि गोवा यांचे संयुक्त विद्यमाने आयोजित 'SINDHUDURG ADVOCATES PREMIER LEAGUE' या वकीलांच्या लेदर बॉल क्रिकेट स्पर्धेचा अंतिम सामना मालवण टोपीवाला बोर्डिंग मैदान येथे रविवार 23 मार्च रोजी संपन्न होणार आहे.
रविवारी सुरुवातीला महिला वकीलांचे दोन प्रदर्शनीय क्रिकेट सामने सकाळी 9.15 ते 12 वाजण्याच्या कालावधीत आयोजित करण्यात आले आहेत.
त्यानंतर श्रीकांत पन्हाळे इलेव्हन सातारा व आर.जे. वॉरिअर्स कोल्हापूर या संघात वीस षटकांचा अंतिम सामना दुपारी 1 वाजता सुरु होणार आहे. अतिशय चुरशीचा सामना उपस्थितांना अनुभवायला मिळणार आहे.
अंतिम सामन्यानंतर सायंकाळी 5 वाजता मत्स्य व्यवसाय व बंदर विकास मंत्री तथा पालकमंत्री नितेश राणे यांचे हस्ते विजेत्यांचे सन्मान व पारितोषिक वितरण समारंभ संपन्न होणार आहे.
सिंधुदुर्ग जिल्ह्याच्या इतिहासात प्रथमच वकीलांचे क्रिकेट सामने एवढ्या भव्य स्वरूपात पार पडत आहेत. तरी सर्व क्रिकेट रसिकांनी मोठ्या संख्येने उपस्थित राहून या क्रिकेट सामन्याचा आनंद लुटावा, असे आवाहन वकील संघटनेने केले आहे.
