एम. एस्सी. गणित स्पर्धेत सुवर्णपदक
मिली मिश्रा | कुडाळ : मुंबई विद्यापीठाच्या २०२३-२४ च्या शैक्षणिक वर्षातील एम.एस्सी. गणिताच्या परीक्षेत कुडाळच्या संत राऊळ महाराज महाविद्यालयातील ओंकार दत्ताराम तेंडोलकर यांनी सर्वोच्च यश मिळवत सुवर्णपदक पटकावले. ७ जानेवारी रोजी झालेल्या मुंबई विद्यापीठाच्या दीक्षांत समारंभात राज्यपाल सी.पी. राधाकृष्णन यांच्याहस्ते गौरवण्यात आले. विद्यापीठात गणित विषयात सर्वोच्च गुण मिळवून त्यांनी प्रथम क्रमांक मिळवला.
ओंकार यांनी आपल्या जिद्द, कठोर मेहनत आणि सखोल ज्ञानाच्या बळावर हे यश संपादन केले आहे. त्यांनी गणितातील IAVM द्वारे घेतल्या जाणाऱ्या लीलावती स्पर्धेत प्रथम क्रमांक मिळवला असून IYMC या जागतिक ऑलिम्पियाड स्पर्धेत सिल्व्हर हॉनर पटकावला आहे, ज्यामुळे त्यांची कामगिरी विशेष उल्लेखनीय ठरली आहे.
आपले हे यश त्यांनी आपल्या पालक, प्राध्यापक आणि मार्गदर्शकांना समर्पित केले आहे. ओंकार च्या या यशामध्ये संत राऊळ महाराज, महाविद्यालयाच्या गणित विभागाचे प्रमुख डॉक्टर एस.के. पवार आणि गणित विभागातील इतर प्राध्यापकांचे सहकार्य लाभले, त्याचबरोबर रसायनशास्त्र विभागाचे अजित कानशिडे सर यांचे देखील मोलाचे सहकार्य लाभले.
भविष्यात गणित शिक्षण आणि संशोधनात मोलाचे योगदान देण्याचा त्यांचा मानस आहे. ओंकार यांची गणितातील आवड केवळ शिक्षणापुरती मर्यादित नसून, ते आपल्या "Omkar_10dolkar" यूट्यूब चॅनेल व ब्लॉगद्वारे गणित विषयक ज्ञान पसरवत आहेत. वैदिक गणितावर त्यांनी लिहिलेले ब्लॉग विशेष लोकप्रिय झाले आहेत. तसेच, IYMC सारख्या आंतरराष्ट्रीय स्पर्धांसाठी ते विद्यार्थ्यांना मार्गदर्शन करत आहेत.
ओंकारच्या या यशाचे सर्व स्तरांतून कौतुक होत असून, त्यांची ही सुवर्णमय कामगिरी अनेकांसाठी प्रेरणादायी ठरत आहे.
