चौघांना अटक आणि जामीन
निलेश जोशी | कुडाळ : मैत्रिणीवरून झालेल्या वादाचे रूपांतर बेदम मारहाणीत झाल्याने येथील संत राऊळ महाराज महाविद्यालयाचा विद्यार्थी मॅकविन मारी फर्नांडिस (वय २२, रा. रेवतळे मालवण, सध्या राहणार कणकवली) हा गंभीर जखमी झाला. या प्रकरणी वैभव मनोज कांबळे (वय २२, रा. लक्ष्मीवाडी,कुडाळ) याच्यासह चौघाना पोलिसांनी अटक करून शनीवारी कुडाळ न्यायालयात हजर केले असता प्रथम वर्ग न्यायदंडाधिकारी यांनी त्यांची जामिनावर मुक्तता केली.
याबाबत पोलिसांनी दिलेल्या माहितीनुसार, महाविद्यालयीन विद्यार्थिनीला आपल्या बद्दल काय सांगितले, अशी विचारणा करीत रागाने एक युवक व त्याच्या सहकाऱ्यांनी येथील संत राऊळ महाराज महाविद्यालयात शिकणाऱ्या मॅक्वीन मारी फर्नाडिस (20, मूळ रा.मालवण रेवतळे, सध्या रा कणकवली) याला दुचाकीवर बसवून काही अंतरावर नेले आणि शिवीगाळ व मारहाण केली. तसेच ठार मारण्याची धमकी दिल्याची घटना कुडाळ शहरात एस एन देसाई चौकात गुरुवारी सायंकाळी 4 वाजण्याच्या सुमारास घडली. या प्रकरणी कुडाळ पोलीसांनी पाच जणांवर गुन्हा दाखल केला. यात एका 17 वर्षीय अल्पवयीन मुलाचा समावेश आहे. यातील संशयित वैभव मनोज कांबळी (21,रा. लक्ष्मीवाडी कुडाळ), रोहन महेश शिरसाट (19,रा. उद्यमनगर कुडाळ), प्रज्वल नितीन सावंत (22, रा. वेताळबांबर्डे ), सुरज दिपक राऊळ ( 22, कुडाळ - नाबरवाडी ) अशी नावे आहेत. या चौघांना शनिवारी येथील न्यायालयात हजर केले असता त्यांना न्यायालयीन कोठडी देण्यात आली. नंतर त्या चौघांची जामीनावर मुक्तता करण्यात आली.
मॅक्वीन फर्नाडिस हा येथील महाविद्यालयात शिकत आहे. गुरुवारी सायंकाळी येथील एस एन देसाई चौकात वैभव कांबळी यांने मॅक्वीन फर्नाडिस याला रोहन शिरसाट याच्या स्कुटीवर बळजबरीने बसण्यास सांगितले. त्याच्या स्कुटीवर मॅक्वीन याच्यामागे प्रज्वल सावंत बसला. त्याने महवियालयातील एका विद्यार्थिनीला माझ्याबद्दल काय बोलतो, तुला सांगतो असे म्हणत स्कुटीने त्या चौका पासून तहसीलदार नजीक असलेल्या गार्डन परिसरात नेले. दुचाकीवरून नेत असताना मॅक्वीन याला सातत्याने हाताच्या थापटाने मारहाण केली. गार्डनकडे गेल्यानंतर वैभव कांबळी, रोहन शिरसाट व प्रज्वल सावंत व अन्य एकाने हाताच्या थापटाने मॅक्वीनच्या मानेवर, पाठीवर मारहाण केली. रोहन शिरसाट याने लाकडी दांड्याने त्याच्या पायावर मारहाण केली. तसेच अन्य दोन अनोळखी युवकांनी तेथे येत मॅक्वीनला मारहाण केली. वैभव कांबळी याने शिवीगाळ करून एका विद्यार्थिनीची माफी मागायला लावली व हातपाय तोडुन ठार मारण्याची धमकी दिली. शुक्रवारी रात्री या प्रकरणी पाच जणावर कुडाळ पोलिसांनी गुन्हा दाखल केला. त्यातील चार जणांना आज अटक केली. या बाबतची फिर्याद मॅक्वीन फर्नाडिस याने कुडाळ पोलिस ठाण्यात दिली.
