राजकोट शिवपुतळा दुर्घटना ; तिसऱ्या संशयित आरोपीला अटक

न्यायल्याने सुनावली तीन दिवसांची पोलीस कोठडी

मालवण | प्रतिनिधी : मालवण येथील राजकोट किल्ल्यावर उभारण्यात आलेला छत्रपती शिवाजी महाराजांचा पूर्णाकृती पुतळा कोसळल्याच्या गुह्यातील तिसऱ्या संशयित आरोपीला मालवण पोलिसांनी अटक केली आहे. परमेश्वर रामनरेश यादव ( रा. उत्तर प्रदेश) असे आरोपीचे नाव असून त्याला मालवण येथील न्यायालया समोर हजर केले असता तीन दिवसांची पोलीस कोठडी देण्यात आली आहे. परमेश्वर यादव याने पुतळ्याची जोडणी वेल्डिंग केली होती.

राजकोट किल्ल्यावर डिसेंबर महिन्यात उभारण्यात आलेला छत्रपती शिवाजी महाराजांचा पुतळा 26 ऑगस्ट कोसळला होता. या दुर्घटनेनंतर शिवप्रेमींमध्ये संतापाची लाट निर्माण झाली होती. या प्रकरणात चेतन पाटील आणी जयदीप आपटे या दोघांना यापूर्वी अटक करण्यात आली असून हे दोन्ही न्यायालयीन कोठडीत आहेत. या प्रकरणात गुरुवारी तिसऱ्या आरोपीला अटक करण्यात आली आहे. त्याला न्यायालयात हजर केले असता तीन दिवसांची पोलीस कोठंडी देण्यात आल्याची माहिती पोलीस निरीक्षक प्रवीण कोल्हे यांनी दिली आहे.