मालवण | प्रतिनिधी : कोळंब टेंबवाडी येथील कट्टर राणे समर्थक संदीप विष्णू भोजने (५५) यांचे हृदयविकाराच्या तीव्र धक्क्याने मालवण शहरातील खासगी रुग्णालयात शुक्रवारी सकाळी निधन झाले.
छातीत दुखत असल्याने उपचारासाठी ते स्वतःहून रुग्णालयात दाखल झाले होते. मात्र, उपचारापूर्वीच त्यांचा मृत्यू झाला. भोजने यांच्या मृत्यूची माहिती मिळताच त्यांच्या मित्रपरिवाराने रुग्णालयाच्या परिसरात गर्दी केली होती. संदीप भोजने यांच्यावर शनिवारी सकाळी ८ वाजता कोळंब स्मशानभूमीत अंत्यसंस्कार करण्यात येणार आहेत.
संदीप भोजने परोपकारी वृत्तीचे होते. इतरांना मदतीसाठी सदैव प्रयत्नशील असायचे. खासदार नारायण राणे यांचे कट्टर समर्थक म्हणून त्यांची ओळख होती. कोळंब गावातून लोकसभा, विधानसभा, जिल्हा परिषद आणि पंचायत समिती निवडणुकीत महायुतीला मताधिक्य देण्यासाठी झटणाऱ्या कार्यकर्त्यांमध्ये त्यांचा समावेश होता. त्यांच्या पत्नी प्रतिमा भोजने या सरपंच असताना विकासकार्यात संदीप भाजने यांचा पुढाकार होता. त्यांच्या आकस्मिक निधनाची बातमी कळताच अनेकांना धक्का बसला. त्यांच्या पश्चात पत्नी, मुलगा, भाऊ, विवाहित बहिणी असा परिवार आहे.
संदीप भोजने यांचे हृदयविकाराच्या धक्क्याने निधन
