अन्नसुरक्षा नियम सर्व धर्मीयांसाठी समान लागू असावेत !

मंदिर महासंघाची मागणी : हिंदूंच्या सण-उत्सवांमधील महाप्रसाद व अन्नदान प्रक्रियेवरील एकतर्फी कारवाई बाबत नाराजी

मालवण | प्रतिनिधी : हिंदूंच्या सण-उत्सवांमध्ये आयोजित करण्यात येणाऱ्या महाप्रसाद व अन्नदानाच्या प्रक्रियेवर अन्नसुरक्षेच्या नावाखाली होणाऱ्या कथित एकतर्फी कारवाईबाबत तसेच कायदेशीर समानतेच्या तत्त्वानुसार अन्नसुरक्षेचे नियम सर्व धर्मीयांसाठी समानपणे लागू करण्याच्या मागणीसाठी मंदिर महासंघ महाराष्ट्राच्या वतीने मालवण तहसीलदार गणेश लव्हे यांना निवेदन देण्यात आले.

यावेळी श्री गिरोबा देवस्थान नांदरुखचे मानकरी व सरपंच रामचंद्र गोविंद चव्हाण, श्री गिरोबा देवस्थान साळेलचे मानकरी व माजी सरपंच कमलाकर गावडे, मानकरी राजाराम दाजी गावडे, मंदिर महासंघाचे दीनानाथ गावडे, इनामदार श्री देव रामेश्वर संस्थान कसबा आचरेचे रुपेश साटम, श्री काळबादेवी मंदिर मालवणचे मानकरी संदीप धुरी, श्री देव रामेश्वर देवस्थान कांदळगावचे मानकरी श्रीराम परब, धर्मप्रेमी महेंद्र पाताडे, श्री देवी भद्रकाली देवस्थान रेवंडीचे मानकरी विजय कांबळी तसेच सनातन संस्थेचे अनिकेत फाटक उपस्थित होते.
यावेळी इनामदार श्री देव रामेश्वर संस्थान कसबा आचरे, श्री देव विठोबा देवस्थान देवबाग मालवण, श्री भद्रकाली देवस्थान रेवंडी आणि श्री देव रामेश्वर देवस्थान कांदळगाव यांच्या वतीनेही तहसीलदारांना स्वतंत्र निवेदने देण्यात आली.

▪️अमित खोत, मालवण