मंगेश नलावडे | मालवण : महसूल दिनाचे औचित्य साधून महाराष्ट्र शासनाच्या अन्न, नागरी पुरवठा व ग्राहक संरक्षण विभाग तसेच जिल्हाधिकारी तथा जिल्हा दंडाधिकारी, सिंधुदुर्ग यांच्या वतीने गुणगौरव सोहळा २०२६ आयोजित करण्यात आला. सिंधुदुर्ग जिल्ह्यात विविध क्षेत्रांत उल्लेखनीय कामगिरी करणाऱ्या व्यक्ती व घटकांचा त्यांच्या कार्याची दखल घेत प्रशस्तीपत्रक देऊन यावेळी सन्मान करण्यात आला.
या सोहळ्यात मालवण तालुक्यात उत्कृष्ट व उल्लेखनीय कामगिरी करणाऱ्या तसेच ऑनलाईन धान्य वितरण सेवे मध्येही चांगले काम केलेल्या रेशन दुकानदारांचा विशेष गौरव करण्यात आला. यामध्ये मालवण तालुका रेशन दुकानदार संघटनेचे अध्यक्ष तथा रेवंडी येथील रेशन दुकानदार अमित गावडे, वॉर्ड क्रमांक ४ येथील धान्य दुकानदार सिद्धेश मलये, मालवण तालुका सहकारी खरेदी-विक्री संघाच्या नांदरुख येथील धान्य दुकानाचे दत्ता टक्के, वॉर्ड क्रमांक ६ चे विरेश पाताडे, वॉर्ड क्रमांक ७ चे सत्यविजय ढोलम, मठबुद्रुक येथील धान्य दुकानदार संजय सावंत, कट्टा येथील लीना डान्टस, वायंगणी येथील सुशांत आसोलकर आणि मोगरणे येथील सुंदर फोपळे यांचा प्रशस्तीपत्रक देऊन गुणगौरव करण्यात आला.
यावेळी अपर जिल्हाधिकारी श्रीमती शुभांगी साठे, सिंधुदुर्ग जिल्हा पुरवठा अधिकारी विजय सहारे, श्रीमती आरती देसाई, मालवण तालुका पुरवठा अधिकारी श्रीमती शीला निकस, पुरवठा अव्वल कारकून विशाल कापसे, सचिन पाटील यांच्यासह मालवण तालुका रेशन दुकान संघटनेचे सल्लागार कमलाकांत कुबल, उपाध्यक्ष बाळकृष्ण लुडबे, विलास पांजरी तसेच विविध विभागांतील अधिकारी-कर्मचारी आणि मोठ्या संख्येने धान्य दुकानदार उपस्थित होते.
रेशन वितरण व्यवस्था सुरळीत ठेवण्यासाठी तसेच लाभार्थ्यांना शासनाच्या धान्य योजनांचा लाभ मिळवून देण्यासाठी उल्लेखनीय काम करणाऱ्या दुकानदारांचा झालेला हा सन्मान त्यांच्या कार्याची दखल घेणारा ठरला. या गुणगौरवामुळे मालवण तालुक्यातील रेशन दुकानदारांमध्ये समाधानाचे वातावरण दिसत आहे.
महसूल दिनानिमित्त मालवण तालुक्यातील रेशन धान्य दुकानदारांचा गौरव...!
