आमदार निलेश राणे यांच्या अध्यक्षतेखाली कुडाळ विधानसभा मतदारसंघात 31 जुलै रोजी आयोजन : नागरिकांनी मोठ्या संख्येने सहभागी व्हावे : तहसीलदार गणेश लव्हे यांचे आवाहन
मालवण | प्रतिनिधी : राज्य शासनाच्या निर्देशानुसार 269 कुडाळ मालवण विधानसभा मतदारसंघासाठी 'छत्रपती शिवाजी महाराज महसूल समाधान शिबिर' शुक्रवार, 31 जुलै 2026 रोजी आयोजित करण्यात आले आहे. हे शिबिर सकाळी 11 ते सायंकाळी 4 वाजेपर्यंत सिद्धिविनायक हॉल, रेल्वे स्टेशन रोड, कुडाळ येथे होणार असल्याची माहिती मालवण तहसीलदार गणेश लव्हे यांनी दिली.
या शिबिरात महसूल विभागासह विविध शासकीय विभागांच्या सेवा, दाखले, प्रमाणपत्रे, अर्ज निकाली काढणे, शेतकरी नोंदणीसह विविध योजनांबाबत मार्गदर्शन व आवश्यक सेवा एकाच ठिकाणी उपलब्ध करून देण्यात येणार आहेत. शासनाच्या सेवा तळागाळातील नागरिकांपर्यंत प्रभावीपणे पोहोचविणे हा या उपक्रमाचा मुख्य उद्देश आहे.
269 कुडाळ विधानसभा मतदारसंघाचे आमदार निलेश राणे यांच्या अध्यक्षतेखाली हे शिबिर आयोजित करण्यात येत असून, कुडाळ तालुक्यातील 125 गावे आणि मालवण तालुक्यातील 136 गावांतील नागरिकांनी आवश्यक कागदपत्रांसह उपस्थित राहून शिबिराचा लाभ घ्यावा, तसेच महसूल व इतर प्रशासकीय सेवांसाठी या संधीचा उपयोग करावा, असे तहसीलदार गणेश लव्हे यांनी आवाहन केले आहे.
