सोने तारण फसवणूक प्रकरणातील पीडितांची मालवण पोलीस ठाण्यात सामूहिक तक्रार

संबंधित वित्तीय संस्थेच्या शाखेत छेडले ठिय्या आंदोलन


मालवण |प्रतिनिधी : मालवण मधील एका वित्तीय संस्थेकडून सेफ्टी डिपॉझिट योजनेच्या नावाखाली ग्राहकांच्या झालेल्या कथित आर्थिक फसवणूक व सोने तारण कर्ज गैरव्यवहार प्रकरणातील पीडितांनी सोमवारी आक्रमक पवित्रा घेत मालवण पोलीस ठाण्यात सामूहिक तक्रार दिली. दरम्यान, आर्थिक फसवणूक व सोने तारण कर्ज गैरव्यवहार झाल्याचे सांगत संबंधित वित्तीय संस्थेच्या शाखेत ठिय्या आंदोलन छेडले.

मालवणातील एक वित्तीय संस्थेकडून काही ग्राहकांची सोने कर्जच्या नावाखाली आर्थिक फसवणूक व आर्थिक गैरव्यवहार झाल्याचे सांगण्यात येत आहे. या प्रकरणी मालवण शहर व ग्रामीण भागातील पीडित नागरिकांनी वित्तीय संस्थेच्या शाखेत धडक दिली. "जोपर्यंत आमचे दागिने परत मिळत नाहीत, तोपर्यंत आम्ही येथून हलणार नाही," अशी भूमिका घेत शाखेतच ठिय्या आंदोलन सुरू केले.

याबाबत ग्राहकांनी मालवण पोलीस निरीक्षकांना निवेदन सादर केले आहे. वित्तीय संस्थेच्या काही एजंटांनी आमचा विश्वास संपादन करत सेफ्टी डिपॉझिट योजनेअंतर्गत बँकेत दागिने सुरक्षित ठेवले जातील, त्यावर आकर्षक व्याज मिळेल, असे आश्वासन देण्यात आले. काही दिवस ही योजना सुरळीत चालल्यानंतर व्याज देणे बंद करण्यात आले, "दागिने कुठे आहेत आम्हाला माहिती नाही, तुमच्या नावावर जे दागिने दिसत आहेत तेच तुमचे समजा, ते सोडवा, नाहीतर दागिने लिलावात जातील" अशी भीती दाखविण्यात आली असे ग्राहकांनी निवेदनात म्हटले आहे. ग्राहकांच्या बनावट स्वाक्षऱ्या करून कागदपत्रामध्ये फेरफार करण्यात आले, त्यामुळे ग्राहकांच्या मूळ दागिन्यांचा ठावठिकाणा लागलेला नाही, त्यामुळे संबंधित संस्थेची तात्काळ चौकशी करून गुन्हा दाखल करण्यात यावा, अशी मागणी ग्राहकांनी केली आहे.
यावेळी नगरसेवक विकी तोरसकर यांच्या सोबत कविता मोंडकर, रुपेश प्रभू, दिलीप घारे, कांचन धुरी, सेजल परब, सिया धुरी, माधुरी प्रभू, प्रियल खवणेकर, अक्षता आडकर, ममता कुबल, महिमा प्रभू, रुपेश धुरी, श्रीकृष्ण आडकर, भार्गव खराडे, नारायण आडकर, दाजी जोशी यांसह इतर उपस्थित होते. यासोबत मालवण शहर व तालुक्यातील ग्रामीण भागातील सोने तारण गैरव्यवहार प्रकरणातील अनेक पीडित नागरिक सहभागी झाले होते.