दांडी भक्ती सागरात चिंब : खैदा येथील 'प्रती पंढरपूर' मंदिरातही भाविकांची मोठी गर्दी
मालवण | प्रतिनिधी : "जय जय विठ्ठले रखुमाई... जय जय विठोबा रखुमाई..." या विठुरायाच्या अखंड नामगजरात मालवण शहरातील दांडी किनारपट्टीवर आषाढी एकादशीनिमित्त भव्य वारकरी दिंडी सोहळा उत्साहात पार पडला. श्रीकृष्ण मंदिर ते श्री मोरेश्वर (मोरयाचा धोंडा) आणि तेथून दांडेश्वर मंदिरापर्यंत निघालेल्या या दिंडीत शेकडो वारकरी व भाविक सहभागी झाले होते. ढोल-ताशे, टाळ-मृदुंगाच्या गजरात आणि हरिनामाच्या जयघोषात संपूर्ण किनारपट्टी भक्तिरसात न्हाऊन निघाली.
दांडी येथील श्रीकृष्ण मंदिरात सकाळी ६ वाजल्यापासून पूजाअर्चा, नामस्मरण, भजन व आरतीचे कार्यक्रम संपन्न झाले. दुपारी ३ वाजता ढोल-ताशांच्या गजरात वारकरी दिंडीला प्रारंभ झाला. दांडी ग्रामस्थ, वारकरी आणि भाविक टाळ-मृदुंगाच्या साथीने हरिनाम गात दिंडीत सहभागी झाले होते.
श्रीकृष्ण मंदिरातून निघालेली दिंडी श्री मोरेश्वर (मोरयाचा धोंडा) येथे पोहोचली. तेथे ग्रामस्थांनी नवसपूर्ती व धार्मिक विधी पार पाडल्यानंतर दिंडी दांडेश्वर मंदिरापर्यंत नेण्यात आली. यावेळी विविध पारंपरिक वेशभूषा, हाती भगव्या पताका व ध्वज घेतलेली लहान मुले, तसेच अबालवृद्धांचा उत्स्फूर्त सहभाग लक्षवेधी ठरला. हरिनामाचा अखंड गजर आणि टाळ-मृदुंगाच्या निनादाने दांडी किनारपट्टीवर वारकरी संप्रदायाचा भक्तिमय सोहळा अवतरल्याचे चित्र पाहायला मिळाले.
दरम्यान, मालवण तालुक्यातील ग्रामदैवत व 'प्रती पंढरपूर' म्हणून ओळखल्या जाणाऱ्या खैदा येथील श्री विठ्ठल-रखुमाई मंदिरातही आषाढी एकादशीनिमित्त पहाटेपासून विधिवत पूजाअर्चा, हरिनाम सप्ताह, वारकरी भजने व धार्मिक कार्यक्रम भक्तिभावात संपन्न झाले.
याशिवाय मालवण मेढा, देऊळवाडा, गवंडीवाडा, धुरीवाडा आदी भागांतील श्री विठ्ठल-रखुमाई व श्रीकृष्ण मंदिरांमध्येही आषाढी एकादशी उत्सव मोठ्या भक्तिमय वातावरणात साजरा करण्यात आला. दिवसाभर विविध धार्मिक कार्यक्रम, भजने, कीर्तन आणि नामस्मरणात भाविक मोठ्या संख्येने सहभागी झाले.
