पावसाळ्यात होणाऱ्या आजारांपासून बचावासाठी घ्यावयाच्या काळजीबाबत मार्गदर्शन
मालवण | प्रतिनिधी : ग्रामीण रुग्णालय मालवण यांच्या वतीने जिल्हा परिषद पूर्ण प्राथमिक शाळा, मालवण दांडी येथे पावसाळ्यात होणाऱ्या विविध आजारांपासून बचावासाठी घ्यावयाच्या काळजीबाबत विद्यार्थ्यांना व उपस्थित पालकांना मार्गदर्शन करण्यात आले. विविध आरोग्यविषयक सूचना देण्यात देताना विद्यार्थ्यांना वैयक्तिक स्वच्छतेचे महत्त्वही समजावून सांगण्यात आले. तसेच हिवताप व हत्तरोग या आजारांविषयी माहिती देण्यात आली.
ग्रामीण रुग्णालय मालवण येथील आरोग्य निरीक्षक व्ही. पी. सावंत व क्षेत्र कर्मचारी आर. व्ही. साखरे यांनी हिवताप जनजागृती अभियानांतर्गत जिल्हा परिषद पूर्ण प्राथमिक शाळा, मालवण दांडी येथे भेट देऊन विद्यार्थी व पालकांमध्ये आरोग्यविषयक जनजागृती केली.
यावेळी पावसाळ्यात होणाऱ्या विविध आजारांपासून बचावासाठी घ्यावयाच्या काळजीबाबत विद्यार्थ्यांना व उपस्थित पालकांना मार्गदर्शन करण्यात आले. तसेच हिवताप व हत्तरोग या आजारांविषयी माहिती देण्यात आली. आठवड्यातून मंगळवार हा 'कोरडा दिवस' म्हणून पाळावा, सर्व भांडी घासून-पुसून उपडी ठेवून कोरडी करावीत, पाणी उकळून व गाळून प्यावे, ताजे अन्नपदार्थ खावेत, मच्छरांपासून सुरक्षित राहण्यासाठी शौचालयाच्या पाईपला जाळी लावावी तसेच डबके व रिकाम्या भांड्यांमध्ये पाणी साचू न देण्याचे आवाहन करण्यात आले. यासह विविध आरोग्यविषयक सूचना देण्यात आल्या. विद्यार्थ्यांना वैयक्तिक स्वच्छतेचे महत्त्वही समजावून सांगण्यात आले.
या कार्यक्रमावेळी शाळेच्या मुख्याध्यापिका श्रीमती विशाखा चव्हाण, सहकारी शिक्षिका श्रीमती बागवे, श्रीमती राणे, श्रीमती चौकेकर तसेच अंगणवाडी सेविका श्रीमती मोरजकर उपस्थित होत्या.
▪️ अमित खोत, मालवण
