गवंडीवाडा येथील जलमय रस्त्याची समस्या मार्गी

नगरसेविका शर्वरी पाटकर यांच्या पुढाकाराने नागरिकांना दिलासा

मालवण | प्रतिनिधी : मालवण शहरातील गवंडीवाडा परिसरातील राजा बटाव घर ते बाळू चव्हाण यांच्या घरासमोरील रस्त्यावर गेल्या अनेक वर्षांपासून पावसाचे पाणी मोठया प्रमाणात साचण्याची समस्या निर्माण होत होती. यामुळे स्थानिक नागरिकांना आणि पादचाऱ्यांना त्रासाला सामोरे जावे लागत होते. मात्र, स्थानिक नगरसेविका शर्वरी पाटकर यांच्या तत्परतेमुळे आणि पालिका प्रशासनाच्या सहकार्याने हा प्रश्न अखेर मार्गी लागला आहे.

गवंडीवाडा येथील या अंतर्गत रस्त्यावर पावसाळ्यात मोठ्या प्रमाणात पाणी साचत असे. पाण्याचा निचरा होण्यासाठी कोणतीही योग्य व्यवस्था नसल्याने या भागाला जणू डबक्याचे स्वरूप येत होते. रस्त्यावरून चालणेही कठीण झाल्यामुळे लहान मुले, महिला आणि वृद्ध नागरिकांचे l हाल होत होते. गेली काही वर्षे ही समस्या कायम असल्याने स्थानिकांमध्ये तीव्र असंतोष पसरला होता. स्थानिक रहिवाशांनी या समस्येकडे स्थानिक नगरसेविका शर्वरी पाटकर यांचे लक्ष वेधले.

नागरिकांची अडचण समजून घेत पाटकर यांनी तात्काळ पावले उचलली. त्यांनी पालिका प्रशासनाशी संपर्क साधून संबंधित अधिकाऱ्यांना घटनास्थळाची पाहणी करण्यास सांगितले. प्रशासनाच्या माध्यमातून युद्धपातळीवर कार्यवाई करण्यात आली. रस्त्याची पातळी सुधारली असून, आता पाण्याचा निचरा व्यवस्थित होण्यास मदत झाली आहे.

गेल्या अनेक वर्षांपासून आम्ही या समस्येचा सामना करत होतो. दर पावसाळ्यात इथून चालणे म्हणजे कसरत असायची. पण नगरसेविका शर्वरी पाटकर यांनी आमची अडचण ऐकून घेतली आणि तात्काळ यावर मार्ग काढला. आता रस्ता स्वच्छ आणि चालण्यायोग्य झाला आहे असे स्थानिक रहिवाशांनी सांगितले. या महत्त्वपूर्ण आणि जनहितार्थ कामाबद्दल स्थानिक नागरिकांनी एकत्र येत नगरसेविका शर्वरी पाटकर तसेच पालिका प्रशासनाचे मनापासून आभार मानले आहेत.