मालवण | प्रतिनिधी : मालवण तालुकास्तरीय शेतकरी सल्ला समितीची सभा उत्साहपूर्ण वातावरणात संपन्न झाली. सदर सभेच्या अध्यक्षस्थानी शेतकरी सल्ला समितीचे अध्यक्ष श्री. प्रताप चव्हाण (धामापूर) उपस्थित होते.
सभेमध्ये आत्मा अंतर्गत सन २०२६-२७ मध्ये राबविण्यात येणाऱ्या विविध कृषी विस्तार कार्यक्रमांचे नियोजन करण्यात आले. यामध्ये कृषी प्रात्यक्षिके, संलग्न विभागांची प्रात्यक्षिके, आंतरराज्य, राज्यांतर्गत व जिल्ह्यांतर्गत शेतकरी प्रशिक्षण व अभ्यास दौरे, शेतीशाळा, किसान गोष्टी तसेच शेतकऱ्यांसाठी विविध ज्ञानवर्धक उपक्रमांचा समावेश आहे. या कार्यक्रमांच्या प्रभावी अंमलबजावणीसाठी आवश्यक नियोजन व मार्गदर्शन करण्यात आले.
याशिवाय कृषी यांत्रिकीकरण, फळबाग लागवड योजना, प्रधानमंत्री सूक्ष्म अन्न प्रक्रिया उद्योग उन्नतीकरण योजना (PMFME) तसेच शेतकरी हिताच्या विविध योजनांची तालुक्यात प्रभावी अंमलबजावणी करण्याबाबत सकारात्मक चर्चा करण्यात आली. उपस्थित सदस्यांनी योजनांचा लाभ अधिकाधिक पात्र शेतकऱ्यांपर्यंत पोहोचविण्यासाठी समन्वयाने काम करण्याची आवश्यकता व्यक्त केली.
यावेळी जिल्हा परिषद सदस्य तथा बांधकाम सभापती संतोष साटविलकर, जिल्हा परिषद सदस्या वर्षा सांबारी तसेच समिती सदस्य राजन गावडे (चौके), राजेंद्र नाईक (कुणकवळे), चंद्रकांत गोलतकर (पळसंब), सुभाष बिरमोळे (घुमडे), भानजी गावडे (आंबडोस), राधा वरवडेकर (आंबडोस), सानिका मुळे (चिंदर), शंकर गावडे (तिरवडे) उपस्थित होते. तसेच तालुका कृषी अधिकारी, मालवण अर्जुन जाधव व सहाय्यक तंत्रज्ञान व्यवस्थापक निलेश गोसावी यांच्यासह कृषी विभागाचे अधिकारी उपस्थित होते.
सभेत उपस्थित मान्यवरांनी कृषी क्षेत्राच्या सर्वांगीण विकासासाठी व शेतकऱ्यांचे उत्पन्न वाढीसाठी राबविण्यात येणाऱ्या उपक्रमांना सहकार्य करण्याची ग्वाही दिली. आगामी वर्षात तालुक्यात कृषी विकासाला चालना देणारे विविध उपक्रम प्रभावीपणे राबविण्यात येणार असल्याचा विश्वास यावेळी व्यक्त करण्यात आला.
मालवण तालुकास्तरीय शेतकरी सल्ला समिती सभेत कृषी विकासाच्या विविध उपक्रमांचे नियोजन
