राहुल जाधव | मालवण :- युथ बिट्स फॉर क्लायमेट या संस्थेच्या अभिनव उपक्रमातून ओझर विद्यामंदिरच्या विद्यार्थ्यांनी यंदाची वटपौर्णिमा पर्यावरण संवर्धनाचा संदेश देत अनोख्या पद्धतीने साजरी केली.
या उपक्रमांतर्गत शाळेतील इयत्ता पाचवीतील प्रत्येक विद्यार्थ्याने एक वडाचे रोप लावून त्याचे दहावीपर्यंत म्हणजेच सुमारे पाच वर्षे संगोपन करण्याचा संकल्प करण्यात आला. या कालावधीत झाडाची उत्तम वाढ व्हावी यासाठी युथ बिट्स फॉर क्लायमेट संस्था आवश्यक ते सर्व सहकार्य करणार आहे.
या अभिनव संकल्पनेला ओझर विद्यामंदिरचे मुख्याध्यापक जाधव सर, संचालक मंडळातील नरे सर तसेच आशिष पेडणेकर यांनी उत्स्फूर्त प्रतिसाद देत शाळेच्या परिसरात वडाचे रोप लावून उपक्रमाची सुरुवात केली.
यावेळी युथ बिट्स फॉर क्लायमेट संस्थेच्या अध्यक्षा मेगल डिसोझा, संस्थेचे सदस्य, इकोमेट्स परिवार, शिक्षक व विद्यार्थी उपस्थित होते. या उपक्रमातून विद्यार्थ्यांमध्ये पर्यावरण संवर्धनाची जाणीव निर्माण होण्यासह वृक्षसंवर्धनाची जबाबदारीही रुजविण्याचा प्रयत्न करण्यात आला.
