मालवण | प्रतिनिधी : मालवण एज्युकेशन सोसायटी संचालित अनंत शिवाजी देसाई टोपीवाला हायस्कूल, मालवणच्या विद्यार्थ्यांनी गणित प्रज्ञा परीक्षेत उल्लेखनीय यश संपादन करत शाळेचा नावलौकिक उंचावला आहे. नुकत्याच जाहीर झालेल्या निकालात इयत्ता सहावी 'अ' मधील तीन विद्यार्थ्यांनी विशेष श्रेणी प्राप्त केली.
या परीक्षेत सोहम योगेंद्र धामापूरकर याने सुवर्ण (Golden) पदक पटकावले, तर मधुरा दिपक मिठबावकर आणि जान्हवी निलेश तळगावकर यांनी रौप्य (Silver) पदके मिळवून शाळेच्या यशात मानाचा तुरा रोवला.
गणितासारख्या कठीण विषयात विद्यार्थ्यांनी मिळवलेले हे यश त्यांच्या सातत्यपूर्ण अभ्यास, मेहनत आणि शिक्षकांच्या योग्य मार्गदर्शनाचे फलित असल्याचे शाळेच्या शिक्षकांनी सांगितले.
या उल्लेखनीय यशाबद्दल शाळेचे मुख्याध्यापक, शिक्षकवृंद, संस्था पदाधिकारी, पालक आणि ग्रामस्थांनी गुणवंत विद्यार्थ्यांचे तसेच त्यांना मार्गदर्शन करणाऱ्या शिक्षकांचे अभिनंदन केले. विद्यार्थ्यांच्या पुढील शैक्षणिक वाटचालीस सर्व स्तरांतून शुभेच्छांचा वर्षाव होत आहे.
गणित प्रज्ञा परीक्षेत टोपीवाला हायस्कूलची चमक; तीन विद्यार्थ्यांना सुवर्ण-रौप्य पदके
