17 जणांवर कारवाई
150 किलो प्लास्टिक साठा जप्त
मालवण | प्रतिनिधी : मालवण पालिकेच्या आरोग्य आणि स्वच्छता विभागाच्या वतीने शहरात प्लास्टिकविरोधी धडक मोहीम राबवण्यात आली. सोमवार पेठेतील आठवडा बाजारा दरम्यान आरोग्य पथकाने सोमवार पेठ आणि देऊळवाडा येथील दुकानांवर अचानक छापे टाकले. या कारवाईत 17 जणांवर कारवाई करून तब्बल १५० किलो प्रतिबंधित प्लास्टिक साठा जप्त करण्यात आला. संबंधित व्यापाऱ्यांवर ६ हजार ३०० रुपयांची दंडात्मक कारवाई करण्यात आली आहे.
बंदी असलेल्या प्लास्टिकचा वापर होत असल्याची माहिती पालिकेला मिळाली होती. त्यानुसार आठवडा बाजाराच्या दिवशी ही विशेष मोहीम हाती घेण्यात आली. या अचानक झालेल्या कारवाईमुळे बंदी असलेल्या प्लास्टिकचा बेकायदेशीर वापर करणाऱ्या व्यापाऱ्यांमध्ये एकच खळबळ उडाली आहे. पालिकेच्या या धडक कारवाईत स्वच्छता निरीक्षक संजय पवार, स्वच्छता लिपिक मंदार केळुसकर, मुकादम आनंद वळंजू, विजतांत्री सुनिलकुमार कदम यासोबतच पालिकेचे इतर सफाई कर्मचारीही या मोहिमेत सामील झाले होते.
पर्यावरणाचा ऱ्हास रोखण्यासाठी आणि शहर स्वच्छ ठेवण्यासाठी व्यापाऱ्यांनी व नागरिकांनी प्रतिबंधित प्लास्टिकचा वापर पूर्णपणे थांबवावा, अन्यथा यापुढेही अशीच तीव्र दंडात्मक कारवाई सुरू राहील, असा इशारा पालिकेच्या वतीने देण्यात आला आहे.
फोटो : (अमित खोत, मालवण)
